Acabouse a neve?

Posted: under O tempo.

Comezamos unha nova semana falando da neve da fin de semana, verdade? Agora toca saber se seguiremos con ela, con chuvia soa, sen nada diso, se seguirá o frío; vamos, preguntando polo tempo, non si? Pois aí vou eu coa resposta.

O que temos con nós é un norte peninsular con máis nubes e menos, nalgúns sitios ningunha, tal e como podes ver na seguinte imaxe de satélite de primeira hora desta tarde.

Pois ben, aínda mañá exercerán a súa influencia as baixas presións ao norte da península Ibérica mandando unha fronte que afectará principalmente ao noroeste e norte e non tanto ao resto. Polo tanto, nesas zonas predominarán as nubes e a chuvia, neve por riba dos 1000 metros, tal e como podes ver na seguintes imaxes do modelo GFS previstas para mañá ao mediodía para os campos de isóbaras e nebulosidade á esquerda e o campo de precipitación á dereita.

Xa logo, a partir do mércores comeza estabilazarse a situación debido a que as altas presións que arestora están no Atlántico irán entrando en territorio penisular. Aínda quedará algo de nebulosidade polo norte e mesmo algo de chuvia, pero en xeral, será bastante sol. Pódelo ver nas seguintes imaxes previstas para a madrugada do mércores ao xoves para as mesmas variables anteriores e o mesmo modelo meteorolóxico.

Si, tamén subirán as temperaturas co avance da semana. Notarase sobre todo polo centro e sur peninsulares.

O vento estará tranquilo en liñas xerais, agás no val do Ebro, polo norte e sur onde se notará con certa intensidade.

E en Galicia que? Pois de todo. Para mañá teremos nubes e chuvia ata o mércores pola mañá e logo virá certa estabilidade ata final de semana cando voltará a inestabilidade, sobre todo polo oeste do país. É dicir, mañá martes chove e aguantaría sen chover ata a madrugada do xoves ao venres con máis sol canto máis ao sur. De temperatura sen moitos cambios e pouco vento, agás polo norte onde soprará con máis intensidade.

Como les, toca voltar a estabilidade co paso da semana. Unicamente polo norte haberá máis nubes e algo de chuvia, neve en cotas altas.

Comentarios (0) Xan 15 2018

Volta a neve?

Posted: under O tempo.

Estamos ás portas dunha nova fin de semana na que estás a pensar se parará este frío, se voltará a neve, se será simplemente chuvia, non si? Agora paso a responderche a todas esas preguntas.

O que temos hoxe con nós é un ceo peninsular con bastante nubes, non estructuras, pero nubes ao fin e ao cabo e que mesmo estiveron a deixar algunha que outra precipitación, tanto en forma de chuvia como en forma de neve.

Pois ben, isto vai cambiar nos vindeiros días. Mañá venres teremos certa estabilidade con algunhas nubes e baixa probabilidade de precipitación, pero xa cara as últimas horas entrará unha fronte que durante a fin de semana barrerá toda a península Ibérica de oeste a leste traendo consigo nubes e precipitación. Coma soe ser habitual irá perdendo forza ata chegar ao leste xa bastante debilitada facendo que a probabilidade de chuvia sexa menor nesa zona e maior canto máis ao oeste. Novamente a cota de neve baixará e fará que moita desa precipitación sexa en forma de neve en moitos puntos por riba dos 800 metros. Podes ver isto nas seguintes imaxes do modelo GFS previstas para o vindeiro sábado ao mediodía para os campos de isóbaras e nebulosidade (esquerda) e o campo de precipitación (dereita).

De temperatura aínda toca ter a man a roupa de abrigo porque non haberá moitos cambios e seguiremos co mesmo frío destes días, máis ou menos.

O vento estará tranquilo en liñas xerais porque salvo polo oeste e algo polo norte, estará relativamente tranquilo.

Si, aínda nos queda chuvia en Galicia. Mañá día tranquilo ata a tarde/noite coa chega dunha fronte que na madrugada de mañá venres cara o sábado e a mañá do sábado vai regar ben o país. Xa logo o que nos quedan son os chuvascos, así que en calquer punto e momento poderá caer, sendo máis probables nas provincias de Coruña e Pontevedra. Seguiremos sen cambios nas temperaturas e con vento en relativa calma na fin de semana e algo máis mañá, previo paso da fronte.

Como les, toca outra fin de semana de chuvia e neve en moitos puntos da península xunto co frío típico desta época do ano.

Comentarios (0) Xan 11 2018

Seguimos con tempo de inverno?

Posted: under O tempo.

Antes de nada, feliz 2018! Porque desde o ano pasado non me atopaba contigo neste rinconciño da rede. Agora, xa coa volta á rutina despois duns días de descanso no Nadal, xa estou de novo aquí para contarche como se presenta o tempo esta semana despois de que fose noticia durante estes días polas nevaradas caídas en moitos puntos da península Ibérica.

De momento seguimos con moitos puntos da península aínda con nebulosidade e deixando precipitacións, tanto en forma de auga como de neve; tal e como podes ver na seguinte imaxe de satélite de primeira hora desta tarde.

Pois ben, a inestabilidade vai a continuar sobre o territorio peninsular durante esta semana. Iso si, a cota de neve irá subindo e, polo tanto, a probabilidade de neve menor, pero chuvia si porque teremos o paso de varios sistemas frontais que anubrarán o ceo e deixarán precipitacións, sendo menos probables e menos intensas canto máis ao leste e máis importantes polo norte. A cota de neve andará sobre os 1000 metros con tendencia a baixar desa altitude no final da semana. Resúmoche todo isto coas imaxes do modelo GFS previstas para o vindeiro mércores ao mediodía para os campos de isóbaras e nebulosidade (esquerda) e o campo de precipitación (dereita).

Imos a seguir co frío durante esta semana, subindo polo sur cara o remate da semana, pero mantendo valores típicos desta época do ano.

O vento estará presente con nós durante toda semana. Mañá notarase menos, pero xa logo irá aumentando a súa intensidade.

Sobre Galicia mantense a inestabilidade. As nubes estarán presentes durante toda semana, sendo o mércores cando haxa máis e deixen bastante chuvia, tal e como podes ver na seguinte imaxe do modelo probabilístico de MeteoGalicia para a probabilidade de precipitación acumulada en 24 horas de máis de 10 l/m2. No resto de días a chuvia tamén estará presente, sobre todo mañá co paso dunha fronte e logo xa será máis intermitente, pero dentro dun ambiente de humidade. As temperaturas estarán sen moitos cambios, con pouca amplitude térmica, con temperaturas típicas de inverno. De vento iremos ben servidos toda a semana.

Como les, preséntase unha semana típica de inverno, tanto en canto precipitacións como en temperaturas, que é o que toca nestas datas nas que estamos.

Comentarios (0) Xan 08 2018

Cambio de ano e cambio no tempo?

Posted: under O tempo.

Estamos a piques de deixar este ano 2017 que no meteorolóxico foi destacado (vagas de calor, furacáns chegando a Galicia e outros fenómenos atmosféricos), pero seguro que o que queres saber ti agora é se vai chove en fin de ano ou non, verdade? Paso a dicircho en nada.

De momento vemos como as nubes son as protagonistas sobre gran parte da península Ibérica e mesmo deixando chuvias ben xeitosas, tal e como podes ver na seguinte imaxe de satélite para este mediodía de hoxe.

Pois ben, a situación non vai cambiar nos vindeiros días, así que a despedida do 2017 e benvida do 2018 virá marcada pola inestabilidade polo noroeste e norte peninsulares e en menor medida no resto. Polo tanto, teremos máis nubes con algo de chuvia polo noroeste e norte e menos nubes e máis sol canto máis ao sur e máis ao leste durante os vindeiros días e que se intensificarán na xornada do domingo co paso dun sistema frontal durante a mañá. Resúmocho coas seguintes imaxes do modelo GFS previstas para o domingo ao mediodía para os campos de isóbaras e nebulosidade (esquerda) e o campo de precipitación (dereita).

As temperaturas seguirán tranquilas con valores suaves. Unicamente as mínimas baixarán un chisco no comezo do ano, pero sen chegar a ser moi frías.

O vento estará presente e con intensidade importante por todo o norte peninsular e sendo menos intenso canto máis ao sur.

Si, Galicia continuará pasada por auga nos vindeiros días. Agora que se abriu a veda toca andar co paraugas a man ou telo cerca. De momento certa tranquilidade ata a madrugada do sábado ao domingo e o domingo pola mañá que será cando máis chova debido ao paso dunha fronte. Antes e despois tocarán nubes, algunha chuvia polo litoral atlántico e algún chuvasco illado. As temperaturas descenderán un chisco, sobre todo mínimas co ano novo e o vento estará con nós todos estes días soprando con certa intensidade, máis no litoral.

Como les, neste recuncho do noroeste toca acabar e comezar ano pasados por auga, mentres que no resto do territorio peninsular estarán máis libres dela.

Só me queda desexarche un MOI BO 2018!!!

Comentarios (0) Dec 29 2017

E despois de Bruno?

Posted: under O tempo.

Antes de nada, BO NADAL, é o que toca por estas datas, así que os meus mellores desexos para ti e os teus que estás lendo estas liñas que che fago cada semana para contarche o tempo.

E falando do tempo, hoxe toca falar da borrasca Bruno que se fixo famosa no día de hoxe e que non está traendo moito vento e chuvia, especialmente afectando ao norte peninsular, tal e como a podes ver na seguinte imaxe de satélite desta mesma tarde.

Pois ben, a situación de inestabilidade vai a continuar. Unha vez marche Bruno chegará outra borrasca, esta vez non tan importante dado que carecerá de nome, e con ela máis frontes e así unha tras outra durante toda esta semana e case, apurando, ata o comezo do ano próximo. Con isto, o que se esperan son moitas nubes con chuvia sobre a península Ibérican e mesmo neve por riba dos 1000 metros, puntualmente máis baixa nalgúns puntos do Pirineos. Podes ver isto nas seguintes imaxes do modelo GFS previstas para o vindeiro mércores ao mediodía para os campos de isóbaras e nebulosidade (esquerda) e o campo de precipìtación (dereita).

As temperaturas seguirán a ser frescas. Agora ben, as mínimas en maior medida, pero tamén as máximas ascenderán ao final da semana.

O vento estará presente toda a semana en todo o territorio peninsular e soprando con certa intensidade en moitos puntos.

Si, volta a chuvia a Galicia. Comezou o día de Nadal e continuará así toda esta semana dado que as nubes e a chuvia serán as protagonistas neste noso país xunto co vento soprando bastante. De temperatura seguiremos sen moitos cambios cunha lixeira tendencia cara o ascenso co paso dos días, especialmente nas mínimas.

Como les, toca chuvia para ir rematando este 2017 e case para recibir o 2018, pero iso xa cho confirmo no remate desta semana.

Comentarios (0) Dec 26 2017

Monotonía meteorolóxica?

Posted: under O tempo.

Ben, xa retomamos isto do frío e sen chuvia, non si? Bueno, algunha gota caeu na fin de semana, pero xa non o de días pasados. E agora que? Continuamos así o cambiamos de novo? Imos ver.

O que temos enriba da península é que anda a usar boina. Polo norte moita nube e mesmo algo de chuvia e no resto sol, tal e como podes ver na seguinte imaxe de satélite de primeira hora desta tarde.

Pois ben, a situación non che vai cambiar moito nos vindeiros días, en liñas xerais. As altas presións estarán sobre a península provocando estabilidade. Polo tanto, o que teremos será moito sol, aínda que polas mañás nalgúns puntos apareza a néboa. Unicamente polo leste, sobre todo nas illas Baleares, aparecerá a inestabilidade, así que non se descartan chuvascos. Podes ver isto nas seguintes imaxes do modelo GFS previstas para o vindeiro mércores ao mediodía para os campos de isóbaras e nebulosidade (esquerda) e o campo de precipitación (dereita).

Si, seguirá o frío, pero menos, tanto en máximas como en mínimas, así que toca seguir abrigado.

O vento seguirá tranquilo, agás pola costa mediterráneo onde se notará e moito, tendendo a remitir no final da semana.

Non, non vai chover a feito en Galicia nos vindeiros días. Mañá martes haberá nubes e podería orballar algo polo norte, pero xa logo o anticiclón nos devolverá a ceo despexado con néboas matinais, algunha xeada e sol durante o día. O frío irá a menos co avance da semana e o vento estará tranquilo.

Como les, temos por diante unha semana típica de inverno anticiclónico, así que toca abrigarse e deixar os paraugas gardadiños ata novo aviso.

Comentarios (0) Dec 18 2017

Tras a tempestade, a calma?

Posted: under O tempo.

Si, aquí estou. A xa de sobra coñecida borrasca Ana non me levou. Simplemente me tomei uns días de descanso, que non de desconexión total. Agora volto a pleno rendemento para contarche como se presentan os vindeiros días nisto do tempo.

O que temos con nós son moitas nubes sobre a península Ibérica e que son as culpables da chuvia que caeu no día de hoxe, tal e como podes ver na seguinte imaxe de satélite de primeira hora desta tarde.

Pois ben, a situación tenderá a estabilizarse co avance dos vindeiros días coa entrada das altas presións. Aínda mañá quedarán moitas nubes e precipitación afectando a gran parte do norte e centro peninsulares, sendo en forma de neve nas zonas altas do Cantábrico e Pirineos. Xa entrados a fin de semana, as nubes quedarán restrinxidas ao norte e será nesa zona onde precipite, chuvia en xeral e neve por riba dos 1000 metros. No resto do territorio peninsular verase bastante sol, aínda que algunha nube tamén aparecerá. Podes ver isto claramente nas saídas do modelo GFS previstas para o sábado ao mediodía para os campos de isóbaras e nebulosidade (esquerda) e o campo de precipitación (dereita).

Si, chegará máis frío. As temperaturas baixarán co avance dos días, así que tocará voltar a abrigarse porque notaremos ese frío.

O vento irá calmando día a día. Aínda mañá soprará con intensidade polo norte peninsular, especialmente no val do Ebro. Logo xa o sábado baixa a súa intensidade para practicamente calmarse o domingo.

Si, parará a chuvia sobre Galicia. Para mañá aínda quedará algunha polo oeste, pero xa logo as altas presións irán collendo sitio e facendo do sol o protagonista na fin de semana, con algunha nube, pero maioritariamente sol. Iso si, polas mañás en zonas do interior haberá néboa. O que si virá é frío. Haberá baixa das temperaturas xunto cunha calma do vento, así que voltaremos a noites frías e días relativamente agradables.

Como les, parece que a chuvia nos abandona, agás polo norte que se xunta coa neve, pero xa no resto toca sol e tranquilidade no tempo.

Comentarios (0) Dec 14 2017

Friaxe, non si?

Posted: under O tempo.

Carallo, que frío!!! Seguro que esta é a expresión que máis estás a dicir nestes días, verdade? Si, a verdade é que vai frío e co vento aínda se sente máis. E seguiremos así? A ver…

De momento vemos como as nubes están restrinxidas ao norte peninsular e mesmo están a deixar algo de chuvia e neve en zonas altas, tal e como podes ver na seguinte imaxe do satélite de primeira hora desta tarde.

Pois ben, a situación non vai cambiar moito nos vindeiros días. As altas presións ao oeste das illas Británicas e as baixas presións sobre Centroeuropa seguirán traendo aire frío de latitudes máis altas e, polo tanto, mantendo este frío con nós. Ao mesmo tempo esta humidade que traen debido á súa orixe marítima fai que se forme nebulosidade polo norte e nos deixe precipitacións, sendo en forma de neve, e de xeito importante, por riba dos 600 metros. Mentres isto ocorre polo norte, no centro e sur seguirán con bastante sol, aínda que algunha nube para deslucir o ceo azul. Faite unha idea desta situación coas seguintes imaxes do modelo previstas para o vindeiro sábado ao mediodía para os campos de isóbaras e nebulosidade (esquerda) onde podes ver as altas e baixas presións xunto cos nubes que se forman e o campo de precipitación (dereita).

Si, como xa che dixen, seguirá o frío, tanto de día como de noite, durante mañá venres e a fin de semana, así que toca seguir abrigados e ter coidado coas xeadas nocturnas que prometen ser importantes en moitos puntos da península.

O vento tamén se une a esta festa de temporal de frío e neve porque polo norte e nordeste vai soprar con certa intensidade facendo que a sensación de frío sexa importante.

Si, en Galicia seguiremos co frío que estamos tendo, tanto polo día como polas noites con moitos puntos por debaixo dos 0º e xeadas xeneralizadas. Aínda veremos bastante o sol, aínda que non quente, menos canto máis ao norte onde teremos nubes e non se descarta que deixen algo de chuvia, neve na montaña norte luguesa, en calquer momento. O vento irá a menos segundo avance a fin de semana.

Como les, segue con nós, uns días máis, este temporal de frío e neve que nos ten ateridos durante esta semana á espera de ver que nos ten a atmosfera preparada para a vindeira semana de ponte festiva, pero iso xa cho contarei con calma o luns.

Comentarios (0) Nov 30 2017

Máis frío?

Posted: under O tempo.

Estamos rematando este mes de novembro tan seco que case non se recorda o que é chover, salvo casos específicos e de pouca duración polo norte e noroeste peninsulares, e toca ver que nos deparará a atmosfera no que queda ata decembro, así que vou ver os mapas e contarcho.

O que tivemos hoxe é case un adianto do que se nos ven esta semana, así que toma nota da seguinte imaxe de satélite desta mesma tarde con máis nubes no centro e sur e menos cara o norte e, con matices, veremos algo moi parecido ao longo da semana.

Pois ben, como che adiantei, teremos unha península dividida en dúas partes en canto á predición. Por unha banda, teremos bastantes nubes polo norte debido á entrada de aire frío que aportará moita humidade e mesmo deixarán algo de chuvia, neve en lugares cuxa altitude supere os 500 metros. Por outro lado, as zonas centro e sur peninsulares veranse influenciadas por unha baixa ao norte das illas Canarias desprazándose cara o sur peninsular e que favorecerá a inestabilidade e, polo tanto, a formación de nubes e precipitación, por momentos importante. Podes ver isto nas seguintes imaxes do modelo GFS previstas para o vindeiro mércores ao mediodía para os campos de isóbaras e nebulosidade (esquerda) e o campo de precipitación (dereita).

Si, baixan as temperaturas aínda máis. Ao longo desta semana teremos a entrada dunha masa de aire frío procedente case do polo norte e que fará que baixen as temperaturas, notándose especialmente nas máximas e na cota de neve que poderá baixar ata os 500 metros no norte peninsular. Podes ver canto baixan, máis ou menos, se comparas as dúas seguintes imaxes da temperatura deste mediodía de hoxe e a prevista para o vindeiro xoves a esa mesma hora.

En canto ao vento algún imos ter durante toda a semana, notándose especialmente no litoral norte e en todo o litoral mediterráneo.

E si, tamén chegará o frío a Galicia. Máis do que fixo onte e hoxe. Notarase sobre todo no final da semana en todo o país. Acompañando ao frío estará o vento do norte que provocará unha sensación térmica de fai máis frio. Ah, tamén haberá algo de chuvia, pero esta restrinxida ao norte, mentres que canto máis ao sur, máis sol.

Como les, temos por diante unha semana máis que fría e ademáis con chuvia nunha parte do territorio peninsular onde boa falta fai, así que toca tomar as debidas precaucións porque o xoves volve eu por aquí para dicirche como comeza o mes de decembro.

Comentarios (0) Nov 27 2017

E a fin de semana, que? Chuvia ou sol?

Posted: under O tempo.

Que? A semana veu con xeito en canto a chuvia, non si? Bueno, se estás polo noroeste porque no resto da península quedache a velas vir. E que? Aínda quedará chuvia ou non? Paso a responderche agora mesmo.

Como ves na imaxe de satélite desta mesma tarde, as nubes estiveron polo noroeste e mesmo deixaron algunha que outra gota de chuvia, non moita, pero algo si.

Pois ben, aínda queda algo para mañá venres, pero xa logo as altas presións voltarán a coller sitio sobre a península Ibérica. Mañá teremos o paso dun sistema frontal que anubrará polo norte, centro e oeste peninsulares e deixará chuvia, por momentos ata ben xeitosa, mentres que no resto do territorio peninsular só algunhas nubes, tal e como podes ver nas imaxes do modelo GFS previstas para mañá a primeira hora da tarde para os campos de isóbaras e nebulosidade (esquerda) e o campo de precipitación (dereita).

Xa o sábado, despois de acabar de pasar a fronte pola mañá, teremos que as altas presións irán entrando de novo sobre a península estabilizando a situación e, polo tanto, deixando unha tarde de sábado e domingo con bastante sol e pouca nubes, como podes ver nas seguintes imaxes do modelo previstas para o domingo ao mediodía para as mesmas variables anteriores.

Nas temperaturas non haberá variación ata a fin de semana. Tras o paso da fronte entrará aire frío e fará que baixen xa notándose tanto sábado como domingo, especialmente nas mínimas. Con esta baixada de temperaturas tamén baixa a cota de neve, así que en zonas altas do Cantábrico e Pirineos poderían caer algunhas folerpas de neve.

O vento estará presente con certa intensidade por todo o litoral, sen distincións. No interior unicamente polo noroeste e o val do Ebro terán algunha incomodidade con él.

Si, como xa puideches comprobar, regresou a chuvia a Galicia. Non foi moita, ben é certo, pero menos que nada si e aínda queda algunha para mañá, nalgúns puntos importante e unha pouca menos para a mañá do sábado. Xa logo voltamos ao sol e algunha nube espallada. Tamén voltará o frío na fin de semana coa baixada de temperaturas que nos provocará a entrada de aire frío despois do paso da fronte. O vento non nos abandonará ata o domingo, estando presente tanto mañá como pasado e xa amainando o domingo.

Como les, chega algo de chuvia ao noroeste peninsular e non da chegado ao resto, pero si o frío de novo, así que toca novamente toca tirar de roupa de abrigo.

Comentarios (0) Nov 23 2017