Fin de semana máis que tranquilo?

Posted: under O tempo.

Temos por diante a derradeira fin de semana deste febreiro tolo que estamos a piques de rematar, verdade? Agora imos ver que pinta ten en canto ao tempo.

O que temos e case un sol coma un mundo, agás polo Cantábrico onde as nubes o esconden e mesmo están a deixar algunha que outra gota, tal e como podes ver na seguinte imaxe de satélite de primeira hora desta tarde.

Pois ben, todo pinta a unha fin de semana relativamente estable coas altas presións mandando sobre a península Ibérica. Así, o ceo despexado ou pouco anubrado será o que teremos. Unicamente polo leste e xa na xornada do domingo polo sur haberá algo de inestabilidade coa posibilidade de que aumenten as nubes e deixen algo de chuvia. O resumo disto pódelo ver nas seguintes imaxes do modelo GFS previstas para o vindeiro sábado ao mediodía para os campos de isóbaras e nebulosidade (esquerda) e precipitación (dereita).

Seguiremos con esta friaxe dado que a masa de aire frío que está entrando polo Pirineos seguirá con nós durante toda a fin de semana. Serán especialmente frías as mínimas con xeadas en moitos puntos. Iso si, a cota de neve respetará e andará polos 1000 metros.

O vento estará relativamente tranquilo. Soamente o domingo polo oeste se deixaría notar un chisco máis.

Si, moito sol en Galicia e nada de chuvia, tal e como podes ver coa seguinte imaxe do modelo probabilístico de MeteoGalicia onde a probabilidade de chuvia nos vindeiros 4 días (hoxe incluido) é nula. Irá frío, bastante, polas noites, mentres que polo día aínda respectará con lixeiro ascenso no remate da fin de semana. O vento tranquiliño en liñas xerais.

Como les, unha fin de semana estupenda para facer cousas ao ar libre dado que a atmosfera nos trae estabilidade con moito sol e pouca chuvia.

Comentarios (0) Feb 22 2018

Sol e frío, como é iso?

Posted: under O tempo.

Ben, xa pasou a fin de semana que no tempo veu tranquiliña, sen nada salientable que destacar, pero, como virá a semana? Algún cambio á vista? Vouno ver e contarcho agora mesmo.

Como podes ver na seguinte imaxe de satélite desta mesma tarde, as nubes aínda seguen presentes polo norte peninsular, mentres no resto da península nada, o sol é o que manda.

Pois ben, parece que as altas presións vanse a consolidar sobre gran parte da península, agás polo Mediterráneo onde haberá algo de inestabilidade. Así, o sol estará presente en practicamente todo o territorio peninsular, con algunhas néboas matinais no interior e algunha que outra nube para deslucir o ceo azul; agás polo Cantábrico onde o ceo será máis gris e mesmo con alta probabilidade de chuvia e no Mediterráneo, onde poderá caer algún que outro chuvasco, especialmente nas illas Baleares. Póñoche isto en imaxes do modelo GFS previstas para o vindeiro mércores ao mediodía para os campos de isóbaras e nebulosidade (esquerda) e precipitación (dereita) para que te fagas unha mellor idea.

Si, seguiremos con estas temperaturas, pero con tendencia a ser un pouco máis frías cara o remate da semana, notándose principalmente ese enfriamento polo sur e facendo que a cota de neve vaia baixando ata porse por debaixo dos 1000 metros.

O vento estará presente durante toda a semana e con certa intensidade polo norte e val do Ebro.

Si, semana tranquila en Galicia. O sol será o protagonista, aínda que con algunha nube por aí solta e néboas polo interior ás mañás. Iso si, este sol non quentará moito e a cada día que pase ata fará un chisco de máis frío por culpa deste vento do norte que se deixará notar. Voltarán as xeadas a moitos puntos pola noite.

Como les, toca semana de certa estabilidade con moito sol, pero sen quentar moito dado que aire frío irá collendo sitio sobre a península segundo avancen os días.

Comentarios (0) Feb 19 2018

E que? Fin de semana tranquilo no tempo?

Posted: under O tempo.

Xa pasou o enterro da sardiña e con él rematou o Entroido deste ano e xa toca comezar a pensar no do próximo ano, pero antes de chegue hai que voltar á rutina e dentro diso está que che conte o tempo que se nos aveciña para os vindeiros días, así que iso será o que che vou a contar agora mesmo.

A situación actual é a que podes ver na seguinte imaxe de satélite de primeira hora desta mesma tarde e na que as nubes e a súa chuvia asociada se atopan polo noroeste, mentres que no resto do territorio peninsular xa apenas se ven e está máis despexado.

Pois ben, isto vai a ir cambiando pouco a pouco nos vindeiros días. As altas presións irán entrando polo oeste e estabilizando a situación por esa zona, mentres que polo leste se inestabilizará no remate da fin de semana. É dicir, mañá esperase un día moi semellante ao de hoxe co noroeste e norte con máis nubes e algo de chuvia e o resto con máis sol, tal e como podes ver nas seguintes imaxes do modelo GFS previstas para o mediodía de mañá venres para os campos de isóbaras e nebulosidade (esquerda) e precipitación (dereita).

Xa entrados na fin de semana as altas presións van a ser as que manden e polo tanto deixen un ceo con poucas nubes e con baixa probabilidade de chuvia, agás polo leste e sueste onde se inestabilizará algo e podería caer algo de chuvia na xornada do domingo. Podes ver isto nas seguintes imaxes do modelo para a medianoite do sábado ao domingo para as mesmas variables de antes.

As temperaturas estarán sen cambios no día de mañá e será na fin de semana cando se enfríe un pouco a situación, agás polo sur, onde, pola contra, haberá ascensos térmicos. Aínda así, a cota de neve manterase ao redor dos 1000 metros.

O vento, en liñas xerais, estará tranquilo durante esta fin de semana. Unicamente no Mediterráneo se deixará notar un pouco máis e algo no oeste peninsular.

Si, en Galicia vai parar de chover. Aínda non será mañá, pero na fin de semana si. Ata o domingo non quedará un ceo despexado, pero a probabilidade de chuvia irá a menos segundo avancen as horas. Ao mesmo tempo, as temperaturas serán un chisco máis frías dado que cambia a dirección do vento de suroeste a norte e, sobre todo, notarase nas mínimas. Este vento deixarase notar po momentos.

Como les, toca unha fin de semana relativamente tranquila nisto do tempo, así que o mellor que se pode facer é gozar dela ao ar libre.

Comentarios (0) Feb 15 2018

Tempo de Entroido!!!

Posted: under O tempo.

Estamos a Xoves de Comadres como gran anticipo do Entroido que xa está con nós. Supoño que o disfraz xa o terás listo, así que agora só che queda saber os complementos en función do tempo que che faga, non si? Pois vou a dicircho xa e así vas preparando todo.

De momento o que temos son as nubes polo norte e zonas altas da península Ibérica que seguen a deixar algo de chuvia e, sobre todo, neve; tal e como podes ver na seguinte imaxe de satélite de primeira hora desta tarde.

Pois ben, a situación vai ir cambiando, non moito, pero algo sí. O máis importante é que as temperaturas irán subindo pouco a pouco e con elas a cota de neve. Aínda así, mañá e pasado seguirase con temperaturas bastante frías. En canto as nubes, éstas xunto coa precipitación seguirán principalmente polo norte e noroeste nos vindeiros días de Entroido debido ao paso de varios sistemas frontais, mentres no resto da península gozarase dunha tranquilidade en canto a menos nubes e máis sol. Esa precipitación que afectará ao norte será en forma de neve por riba dos 500 metros mañá e irá subindo co avance dos días. Podes ver isto resumido nas seguintes imaxes do modelo GFS previstas para o mediodía do sábado (arriba) e para o mediodía do luns (abaixo) para os campos de isóbaras e nebulosidade (esquerda) e o campo de precipitación (dereita).

Como dicía anteriormente, as temperaturas manteranse frías mañá e na fin de semana, pero cunha tendencia a ir subindo e que o frío sexa menos e con menos vento que mitigará a sensación de frío, aínda que se manteña a compoñente norte e polo norte se note máis que no resto da península.

Si, este Entroido en Galicia ven con frío e auga. Aínda continuaremos con estas temperatura frías, pero xa cunha sensación menor porque o vento serán, malia que siga notándose un chisco. E si, a chuvia estará presente durante os vindeiros días co paso de varias de frontes: esta madrugada a primeira, despois o domingo e logo o martes e entre elas chegan os chuvascos. Iso si, a neve xa só nas zonas altas porque a cota de neve estará por riba dos 1000 metros.

Como les, polo norte e noroeste o Entroido virá pasado por auga e fresquete, mentres que no resto da península non terán grandes problemas para celebralo como se debería.

Comentarios (0) Feb 08 2018

Seguirá montándoa a neve?

Posted: under O tempo.

Buff, a que se está liando coa neve, non si? Foi unha fin de semana complicada e un luns case peor, como estás a comprobar. Entón a pregunta é, seguirá asi? Paso a responderche agora mesmo.

Se imos á imaxe de satélite desta mesma tarde vemos como as nubes, deixando a súa chuvia e a súa neve, son as protagonistas no día de hoxe, tal e como estás a ler e ver nos distintos medios de comunicación.

Pois ben, seguiremos así ao longo desta semana cunha tendencia a ir remitindo, pero coa inestabilidade presente en moitos puntos da península. Entre as baixas presións instaladas no Mediterráneo e as altas presións ao oeste da península establecerase un corredor de aire frío e húmido que seguirá entrando polo norte mantendo este frío ou mesmo intensificándoo debido ao vento. Xunto a isto, as nubes estarán máis ao norte e deixando precipitacións, chuvia e neve en cotas preto dos 200 metros entre martes e mércores e logo subindo, sendo algunhas destas nevaradas de xeito importante en moitas localidades, aínda máis do que xa teñen destes días. Canto máis ao sur, menos nubes e apenas probabilidade de precipitación. Resúmocho coas imaxes do modelo GFS previstas para o vindeiro mércores ao mediodía para os campos de isóbaras e nebulosidade (esquerda) onde podes ver as altas e baixas presións e o campo de precipitación (dereita), tendo en cota que esa precipitación será en forma de neve en cotas moi baixas.

E si, continuará este frío e ademáis a sensación térmica del aínda será maior debido ao vento de compoñente norte que non só será o culpable da nebulosidade, senón que coa súa intensidade, por momentos importante, fará que a invernía se manteña sobre a península.

Si, continuará o frío sobre a Galicia. A neve nalgúns puntos, sobre todo na provincia de Lugo e montaña de Ourense. Aínda que a cota de neve estará moi baixa, sobre os 200 metros nalgún momento, non haberá tanta precipitación para que calle e se poda ver en localidades pouco habituais para vela, pero si nas zonas altas seguirá presente. Polo resto, frío e alternancia de nubes e claros con máis delas canto máis ao norte ata que a final de semana chegue unha fronte. O vento de compoñente norte fará que sintamos máis frío do que realmente faga.

Como les, seguimos con este tempo de inverno sobre a península, polo menos ata o comezo do Entroido. Xa logo nel, verémolo o xoves con máis detalle.

Comentarios (0) Feb 05 2018

Neve de novo?

Posted: under O tempo.

Estamos en pleno inverno e a neve, moi típica desta época do ano, fixo acto de presenza de novo nestes días e veu con importancia. Agora toca ver se isto vai continuar así ou non e para iso me poño eu a analizar os mapas e contarcho.

A situación actual pódela ver na seguinte imaxe de satélite de primeira hora desta tarde onde tes as nubes que están a deixar a chuvia e a neve polo norte e algunhas outras polo resto do territorio peninsular.

Pois ben, isto vai a continuar. O vento de compoñente norte seguirá a aportar humidade e aire frío facendo que as nubes polo norte sigan sendo as protagonistas e deixen precipitacións que por riba dos 500 metros serán en forma de neve. Pola zona centro e sur estarase máis tranquilos, pero non tanto porque xa o sábado e, sobre todo, o domingo, chegarán nubes e chuvia, sendo o sur o máis afectado na xornada do domingo. Intento resumirche isto con imaxes e para elo collo as saídas do modelo GFS previstas para a medianoite do sábado ao domingo para os campos de isóbaras e nebulosidade (esquerda) e o campo de precipitación (dereita).

Si, do frío non nos libramos durante os vindeiros días e, ademáis, sentirémolo máis porque o vento axudará a que a sensación térmica sexa maior porque a súa intensidade será importante, especialmente no val do Ebro.

E Galicia? Como non podía ser doutro xeito, tocan nubes e chuvascos, máis intensos e frecuentes canto máis ao norte que en cotas superiores aos 600/700 metros poderán ser en forma de neve. Xa se imos cara o sur poderase ver máis o sol e a probabilidade de precipitación será menor, agás nas zonas altas. Continuaremos con este frío que, unido ao vento, fará que o que se note sexa máis que o que o termómetro nos vai dicir.

Como les, toca outra fin de semana típica de inverno, así que haberá que abrigarse e andar con ollo nos desprazamentos.

Comentarios (0) Feb 01 2018

Tempo de?

Posted: under O tempo.

Ala nos vai xa o primeiro mes do ano e veu con movemento polo leste e sueste peninsular durante esta fin de semana e tranquilo no resto, non si? Agora che conto como vai a continuar nos vindeiros días desta semaana.

De momento podes ver na seguinte imaxe de satélite desta mesma tarde como a nebulosidade continúa agora polo sur, mentres no resto do territorio peninsular o ceo despexado é o protagonista.

Pois ben, non che vai cambiar moito isto en liñas xerais. As altas presións seguirán mandando sobre a península Ibérica manténdose a inestabilidade polo centro e sur. Todo isto se traduce que as nubes coa chuvia estarán presente nese centro e sur da península, mesmo sendo importante a chuvia e o ceo despexado no resto coa aparación de nubes e precipitación, en forma de neve en zonas altas, polo norte mediada a semana debido ao paso dun sistema frontal. Podes ver isto graficamente nas seguintes imaxes do modelo GFS previstas para o medianoite do vindeiro mércores ao xoves para os campos de isóbaras e nebulosidade (esquerda) e precipitación (dereita).

As temperaturas nesta primeira parte da semana estarán sen cambios e será cara o final cando polo norte descendan e ascendan polo sur.

O vento dará moita guerra polo sur durante toda a semana e manterase en calma ou moi frouxo no resto do territorio peninsular.

Pois imos a por unha semana tranquila en Galicia. As altas presións prevalecerán e, polo tanto, ceo con poucas nubes con máis canto máis ao norte que mesmo cara o mércores a última hora da tarde e o xoves poderían deixar algo de chuvia. O vento estará tranquilo ata o xoves que será cando se note un chisco máis.

Como les, toca semana co tempo partido en dous sobre a península. Cando chove no centro e sur, non o fai polo norte e logo cambian as tornas cara o final da semana.

Comentarios (0) Xan 29 2018

Fin de semana tranquilo, si ou non?

Posted: under O tempo.

Estamos a rematar esta semana relativamente tranquila nisto do tempo se exceptuamos o día de hoxe, non si? Agora chega a fin de semana e estás preparando cousas para facer, así que vou ver se che aclaro algo do tempo para que o poidas facer mellor.

Como puideches comprobar e poderás ver na seguinte imaxe de satélite desta mesma tarde, as nubes e a chuvia foron as protagonistas sobre a península Ibérica no día de hoxe.

Pois ben, todo indica que a tendencia será á estabilización da atmosfera nos vindeiros días. Mañá venres aínda quedaría bastantes nubes e precipitacións polo centro e norte principalmente e menos canto máis ao sur. Ter en conta que esta precipitación pode ser en forma de neve por riba dos 700/800 metros, puntualmente por riba dos 500 nalgún punto, tal e como podes ver nas seguintes imaxes do modelo GFS previstas para este venres ao mediodía para os campos de isóbaras e nebulosidade (esquerda) e o campo de precipitación (dereita).

Xa na fin de semana a situación será máis estable en liñas xerais. As altas presións influenciarán á península e, polo tanto, haberá moito sol. Iso si, polo norte aínda quedarán nubes e algo de chuvia porque neve moi pouca dado que a cota de neve ira subindo co paso dos días. Xa polo sueste comezará a haber inestabilidade coa aparición de nubes e chuvia. Podes ver isto nas imaxes do modelo previstas para a medianoite do sábado ao domingo para as mesmas variables de antes.

Si, tamén suben as temperaturas. Aínda teremos frío mañá venres, pero xa logo notarase un ascenso na fin de semana con temperaturas un pouco máis cálidas, pero nos valores desta época do ano.

O vento será moi protagonista porque soprará e ben en gran parte da península, especialmente polo nordeste mañá venres e logo polo leste e sueste na fin de semana.

Si, case remata a chuvia en Galicia. Aínda quedarán algúns chuvascos, en forma de neve nas zonas altas, no día de mañá venres e logo xa máis restrinxido ao norte o sábado. O domingo xa se tranquiliza a situación e ata poderemos gozar dunha xornada de bastante sol. Ao mesmo tempo que se estabiliza isto iremos notando como suben as temperaturas, sobre todo o domingo. O vento aínda se notará mañá, pero xa logo estará máis tranquilo na fin de semana.

Como les, toca fin de semana relativamente tranquila, agás polo norte e sueste onde algo de entremento chuvioso haberá.

Comentarios (0) Xan 26 2018

Máis estabilidade?

Posted: under O tempo.

Rematamos unha fin de semana relativamente tranquila nisto do tempo se a comparamos coas anteriores, non si? Agora comeza unha nova semana e imos ver que nos trae a atmosfera.

De momento salvo polo noroeste e norte con algo de chuvia e algunhas nubes por aí perdidas no centro e sur, o resto é o sol o que manda sobre a península Ibérica; tal e como podes comprobar se ves a seguinte imaxe de satélite de primeira hora desta tarde.

Pois ben, imos a continuar así ata mediados de semana que ven unha fronte. Mañá martes será un día tranquilo con bastante sol e algunha nube por aí solta con néboa en moitos puntos do interior, como podes ver nas seguintes imaxes previstas para mañá ao mediodía do modelo GFS para os campos de isóbaras e nebulosidade (esquerda) e o campo de precipitación (dereita).

Isto aguantará ata o mércores pola tarde que será cando unha fronte entre polo noroeste e barra nas seguintes horas de oeste a leste a península deixando moita nube e chuvia que se transformará en chuvascos detrás do paso desta fronte. Pódelo ver nas seguintes imaxes do modelo previstas para o xoves ao mediodía para as mesmas variables de antes.

Xunto coa chuvia tamén chega algo de frío porque as temperaturas a partir do mércores baixarán e con ela a cota de neve colocándose por baixo dos 1000 metros polo noroeste no final da semana.

O vento, agás polo noroeste, estará tranquilo durante toda a semana. Iso si, aí notarase e ben co paso da fronte.

Si, voltará a chuvia con xeito a Galicia. Despois duns días húmidos, incluído o de mañá martes, con nubes baixas e chuvia feble será o mércores cando, coa visita da fronte, as nubes serán máis densas e con máis auga co paso da fronte e logo cos chuvascos os xoves e mesmo algún deles con saraiba e en forma de neve por riba dos 700/800 metros. Tamén teremos descenso de temperaturas progresivo co avance dos días, ao mesmo tempo que aumenta a intensidade do vento.

Como les, rómpese esta tranquilidade no tempo peninsular e chega auga a moitos puntos do territorio peninsular.

Comentarios (0) Xan 22 2018

Tempo estable?

Posted: under O tempo.

Andamos xa pola metade de xaneiro e coa neve aínda por aí. Esta semana non moita, pero pendente dela por se chega na fin de semana, non si? Pois agora mesmo che digo se ven máis ou non.

Como podes ver na seguinte imaxe de satélite de primeira hora desta tarde, as nubes andan presentes polo norte peninsular, mentres que no resto da península o sol é o protagonista.

Pois ben, esta situación non che vai cambiar moito na fin de semana. As altas presións serán as que manden sobre a península Ibérica aportando estabilidade e moito sol. Unicamente o norte romperá isto dado que será alí onde manden as nubes e mesmo con algo de chuvia e neve, pero pouca porque a cota de neve irá subindo por riba dos 1500 metros. Resúmoche isto coas seguintes imaxes do modelo GFS previstas para o sábado ao mediodía para os campos de isóbaras e nebulosidade (esquerda) e o campo de precipitación (dereita).

Coa consolidación das altas presións, as temperaturas estarán en ascenso, notándose principalmente polo sur e leste peninsulares. Iso si, de noite aínda seguirán a ser frías.

O vento fará das súas polo norte e leste, sobre todo polo val do Ebro. Irá a menos co remate da fin de semana igualándose á tranquilidade que haberá no centro e sur peninsulares.

Si, gran parte de Galicia estará baixo as nubes e mesmo con algo de chuvia durante toda a fin de semana. Canto máis ao sur e leste, máis sol e menor probabilidade de chuvia. De temperatura ben porque apenas haberá cambios e os poucos serán para que faga un chisco máis de calor. O vento polo norte tocará un pouco as narices, mentres que polo sur estaremos tranquilos.

Como les, toca tempo estable en gran parte do territorio peninsular, agás polo norte onde a humidade da nebulosidade e a chuvia estarán presentes durante estes días.

Comentarios (0) Xan 18 2018