Máis sol, si ou non?

Posted: under O tempo.

Despois duns días tan solleiros como os que estivemos e estamos a ter seguro que xa estás barruntando cando se acaba e todo iso, non si? Pois voute sacar de dúbidas xa.

Hoxe seguimos co sol como protagonista sobre a península Ibérica. Hai algún sitio onde non tanto, mais ben colleron sitio as nubes de evolución e deixaron algún chuvasco treboento polo noroeste, pero en xeral é o que manda, tal e como podes ver na seguinte imaxe de satélite desta mesma tarde.

Pois ben, as altas presións van a continuar sobre a península durante os vindeiros días, pero coa visita dun elemento inesperado que poderá facer das súas. Este elemento é unha DANA (Depresión Aislada en Niveles Altos) que chegará ao oeste-suroeste e inestabilizará esa zona na fin de semana. A posición exacta aínda é unha incógnita e os modelos, tanto deterministas como probabilísticas, aínda non o teñen claro. De todos os xeitos, a inestabilidade por todo o oeste e suroeste peninsular estará garantizada, así que a chuvia, algunha de xeito treboento, estará presente na fin de semana, mentres que no resto a tranquilidade e estabilidade con sol estará garantizada. Podes ver isto, desde o punto de vista determinista, nas saídas do modelo GFS previstas para o vindeiro sábado pola tarde para os campos de isóbaras e nebulosidade (esquerda) e o campo de precipitación (dereita). Antes disto, toca gozar deste venres tan solleiro e caloroso.

De temperatura seguiremos igual, con calor, cecais máis da que se debería nesta época do ano e coa ameaza de subir o domingo polo sur.

O vento non será problema agás se te atopas polo sur onde o vento de levante seguirá facendo das súas con certa intensidade.

Si, aínda queda sol en Galicia para os vindeiros días. Algunhas nubes altas deslucindo o ceo azul e treboadas polo interior no día de hoxe, pero estabilidade en liñas xerais, agás as treboadas. A situación non vai cambiar moito nos vindeiros días, pero mantense certa incertidume para a fin de semana, especialmente o domingo, en como esa DANA nos vai a afectar. O que si parece é que este día xa haberá máis nubes e mesmo chegaría algo de chuvia, pero hai que ir vendo como evoluciona a situación mañá e pasado. O que si teremos é calor dado que se manterán estes valores de temperatura tan cálidos para este mes de abril que, xunto coa case ausencia de vento sentirase máis bochorno.

Como les, mantense certa estabilidade sobre a península, pero con aparición de inestabilidade polo oeste e suroeste que hai que ir seguindo para ver onde afecta exactamente.

Comentarios (0) Abr 19 2018

Sol, pero ven para quedarse?

Posted: under O tempo.

Ben, pasamos esta fin de semana na que os do tempo non nos cansamos de dicirche que por fin chegará o sol e marchará a chuvia, pero, por canto tempo? Xa cho digo agora mesmo.

De momento vemos como o sol desde a súa posición afecta a toda península Ibérica dada a ausencia de nubes, tal e como podes ver na seguinte imaxe de satélite de primiera hora desta tarde. Unicamente polo nordeste e as illas Baleares houbo nebulosidade que mesmo deixou algunha que outra treboada con saraibada.

Pois ben, parece que o sol si veu para quedarse con nós, polo menos ao longo desta semana. As altas presións consolídanse sobre a península Ibérica aportando toda a estabilidade que non había ata agora e, polo tanto, dando lugar a uns días con moito sol e poucas nubes. Agora ben, cara finais de semana haberá que estar atentas/os á posibilidade dalgunha treboada polo nordeste. Podes ver isto resumido nas seguintes imaxes do modelo GFS previstas para o vindeiro mércores ao mediodía para os campos de isóbaras e nebulosidade (esquerda), coas altas presións e as poucas nubes, e o campo de precipitación (dereita), nese caso coa ausencia dela.

Con todo isto o que se espera é un ascenso das temperaturas e así vai ser, así que chegaremos a valores máis típicos da primavera e mesmo nalgúns puntos máis de verán.

Salvo un chisco polo noroeste e ao final de semana polo sur o vento de levante, no resto todo moi tranquilo durante esta semana.

Veña, que xa para de chover en Galicia. Aínda que non o creas, para esta semana toca bastante sol, como xa puideches comprobar hoxe como un adianto do que será esta semana. Iso si, cara finais de semana hai que ter en conta a posibilidade dalgunha treboada pola tardiña, así que non esquezas este detalle. Ao mesmo tempo que o sol, tamén teremos aumento das temperaturas por riba dos 20º en moitos puntos e rozando os 30º no interior no remate da semana. O único pero podería ser é que haberá algo de vento.

Como les, a primavera instálase esta semana e mesmo rozando o verán en canto a temperaturas, así que garda a roupa de abrigo e o paraugas que esta semana non che farán falta.

Comentarios (0) Abr 16 2018

Parará de chover?

Posted: under O tempo.

Ben, outra semana pasada por auga, non si? E haberá tregua algunha nos vindeiros días? Iso é o que vou ver e contarche agora mesmo, así que non me lío e vou a elo.

Hoxe aínda mandan as nubes e gran parte da península e mesmo deixaron algo de chuvia, tal e como podes ver na seguinte imaxe de satélite de primeira hora desta tarde.

Pois ben, parece que algo si vai cambiar nos vindeiros días. O que? Pois que na fin de semana van madar máis as altas presións que as baixas. Mañá venres aínda persistirá a inestabilidade tras o o paso dunha fronte esta tarde e noite afectando a toda península menos ao leste, así que os chuvascos, algúns deles treboentos, serán os que manden, tal e como podes ver nas seguintes imaxes do modelo GFS para mañá venres ao mediodía para os campos de isóbaras e nebulosidade (esquerda) e o campo de precipitación (dereita).

Xa entrada a fin de semana é cando chegan os cambios en sí e as altas presións relativas son as que mandarán en gran parte da península Ibérica, agás o domingo polo oeste onde unha novo fronte fará acto de presenza traendo consigo de novo as nubes e a precipitación. Podes ver isto nas seguintes imaxes do modelo GFS para a medianoite do sábado ao domingo para os mesmos campos de antes.

Polo menos este frío que estamos a ter en abril irá marchando xa que se prevé unha subida das temperaturas segundo avancen os días que coa case ausencia de vento podería dar unha fin de semana agradable.

Si, parará de chover en Galicia, pero só o sábado porque arestora xa temos unha nova fronte enriba que será a culpable dos chuvascos de mañá venres. O sábado un día de tregua con baixa probabilidade de chuvia á espera de que o domingo chegue outra fronte e volte a chuvia, especialmente polo sur do país. Tamén teremos temperaturas máis calorosas e non tan frías para estarmos en abril. O vento notaráse por momentos, pero non moito.

Como les, parece que a chuvia dará unha tregua na fin de semana, agás polo noroeste onde esa tregua será só de un día e ademáis as temperaturas axudarán.

Comentarios (0) Abr 12 2018

Vai por ti, MeteoEsteban

Posted: under O tempo.

Xa fai un par de días que nos deixaches orfos a todas e todos os que nos dedicamos á meteoroloxía. Unha mágoa que te nos foras!!

Porque te facías querer pola túa paixón á meteoroloxía e como coa túa ilusión por aprender nesa materia facías que todos nós, os que nos dedicamos a este mundo, melloraramos no noso traballo diario. Todas as túas suxerencias e aportacións sempre eran útiles para o noso traballo. Do mesmo xeito que a túas amplas fontes permitían que cada vez que falabamos dalgún tema, xa tiña no meu correo electrónico ou no meu twitter os artigos científicos correspondentes para poder traballar no tema.

Da túa profesión de informático e da túa paixón á meteoroloxía fixeches un cóctel estupendo que nos serviu de axuda e que a RAM (Revista del Aficionado a la Meteorología) deu conta del, así como distintas aplicacións que nos axudaron no noso traballo aquí en MeteoGalicia. Grazas aos teus excels tiñamos unha validación e estadísticas de comportamento da malla de maior resolución (4km) para Xixón e Oviedo, nos bordes da malla onde a fiabilidade dos datos é menor e puidemos comprobar a súa bonanza nos resultados na predición do noso modelo WRF. Aínda recordo ese agasallo recibido no meu mail cun arquivo html onde tiña acceso ás saídas dos distintos modelos meteorolóxicos que se atopan libres para a súa consulta.

Fúcheste sen que puidesemos pagar a débeda que tiñamos contigo. Podías ver as gráficas do noso modelo probabilístico, con acceso as meteogramas exclusivos para ti, e sabes que estamos negociando a disponibilidade pública deses datos e que serías o primeiro en sabelo para que, co teu bo facer, puideses traballar con eles.

Estrañarei eses chíos e rechíos teus ás mañás cando encenda o móbil. Tentabas divulgar todo o interesante que de meteoroloxía caía nas túas mans cos teus horarios tan pouco habituais, mais ben un pouco noctámbulos.

Non só como profesional eras bo, no persoal aínda mellor. Sempre preocupado por todo e dándome ánimos sempre que estimabas que eran precisos. Coñecímonos fisicamente en Madrid, na primeira xuntanza de ACOMET (Asociación de Comunicadores de Meteoroloxía) alá polo 2013 e desde aquela non perdemos o contacto. Non pasaba un verán en que durante as túas vacacións en Corme te acercaras a Santiago para compartir unhas horas comigo e degustarmos unhas racións de “pulpo” no mesón de Concheiros e manter unha conversa moi agradable, tanto sobre meteoroloxía como doutras cousas, tal e como queda constancia nesta foto da túa visita este verán pasado.

Si, escríboche en galego porque ben sei que despois de vivires en Ourense algo aprendiches e sempre tentaches usalo comigo, a pesar dos teus poucos coñecementos. Ese esforzo tamén di moito de ti.

Simplemente dicirche que se che botará moito de menos e que me esperes nas nubes cunha boa caña que xa levo eu o pulpo.

Unha aperta, Esteban.

Comentarios (0) Abr 10 2018

E segue a chover?

Posted: under O tempo.

Comezamos unha nova semana neste mes de abril que parece que neste comezo fai caso ao dito de “en abril, augas mil”, pero seguirá a facelo? Ímolo ver agora mesmo.

Como podes observar na seguinte imaxe de satélite desta mesma tarde, as nubes e a súa precipitación asociada seguen a ser as protagonistas no día de hoxe sobre a península Ibérica.

Pois ben, a situación non che vai cambiar moito ao longo desta semana. As borrascas continuarán visitando a península e, polo tanto, mantendo esta inestabilidade atmosférica que nos está a acompañar desde fai semanas. A primeira delas, esa estrutura en forma de coma que ves na imaxe anterior, chegará no día de mañá e traerá consigo moita nebulosidade e moita chuvia, tal e como podes observar nas seguintes imaxes do modelo GFS previstas para mañá martes ao mediodía para os campos de isóbaras e nebulosidade (esquerda) e precipitación (dereita).

Xa pasada esta primeira borrasca intensa, continuará a inestabilidade ata a chegada doutra borrasca no final da semana. Así, o ceo con nubes e precipitacións seguirán presentes, pero desta vez non tan continuas e persistentes, máis tipo chuvasco e repartidos por zonas: o mércores máis cara o nordeste e leste e o xoves no resto, pero sin librarnos de chuvia. Podes facerte unha idea vendo as saídas do modelo GFS para a medianoite do mércores ao xoves para os mesmos campo de antes.

Seguiremos con temperaturas frías para esta época do ano e mesmo fará que a cota de neve esté baixa. Andará arredor dos 1000 metros en todo o norte peninsular, póndose puntualmente por baixo desa cota. Xa no resto da península máis alta.

O vento tamén se une a festa e estará presente durante toda a semana, notándose principalmente no litoral oeste e sur.

Si, seguimos baixo a chuvia en Galicia. Mañá con xeito en todo o país e xa logo quedará un pouco máis espallada, pero quedará toda a semana, así que toca semana húmida de nubes e chuvia. En zonas altas non será chuvia, senón neve. Virá máis frío se contamos que estamos en abril, así que toca abrigarse un chisco. O único que o vento non dará moito a lata e aínda que se notará, non será moi molesto.

Como les, seguimos con este case inverno en abril porque tanto a chuvia, neve en zonas altas, e as temperaturas frías para esta época seguirán con nós.

Comentarios (0) Abr 09 2018

Chuvia ou non chuvia?

Posted: under O tempo.

Estamos rematando outra semana non especialmente tranquila nalgúns puntos da península, pero nos deixou hoxe un día case primaveral con bastante sol e temperaturas agradables, pero vai durar? Agora che contesto.

Como che dicía e na seguinte imaxe de satélite de primeira hora desta tarde tes a proba do día de bastante sol que tivemos hoxe. Iso si, algunhas nubes medias e altas se colaron por aí para deslucir un ceo completamente azul.

Pois ben, sinto dicirche que isto non vai a continuar nos vindeiros días. Voltamos ás andadas e borrasca tras borrasca van a ir achegándose á península Ibérica coas súas frontes asociadas. Polo tanto, xa mañá entrará a primeira fronte que anubrará e deixará precipitacións de oeste a leste perdendo intensidade e frecuencia no seu avance. Aínda asi, non se descarta que se de algunha treboada nalgún punto da península. Unha vez pase esta fronte virá outra detrás dela na fin de semana repetíndose a mesma situación. Pola neve non hai que temer porque a cota vai a estará alta, por riba dos 1500 metros durante gran parte do tempo. Podes ver isto resumido nas seguintes imaxes do modelo GFS previstas para o sábado ao mediodía para os campos de isóbaras e nebulosidade (esquerda) e o campo de precipitación (dereita).

As temperaturas irán baixando co paso dos días, notándose máis o frío polo norte e non tanto canto máis ao sur.

O vento estará presente en practicamente toda a península no día de mañá e xa menos durante a fin de semana, pero non tanto no litoral oeste e sur, onde se manterá.

Como podes deducir voltan as precipitacións a Galicia. Despois do día de hoxe tan tranquiliño voltan as frontes e todo o que traen con ela: nubes, precipitación e vento. Así, teremos un días con bastante nebulosidade e chuvia, momentos máis de chuvascos tralo paso das frontes, sendo o sábado o maior exemplo, e algún momento longo sen chuvia. Tamén baixarán as temperaturas e fará algo de vento.

Como les, voltamos de novo a un tempo máis chuvioso e frío, así que toca esperar para recuperar a tranquilidade meteorolóxica.

Comentarios (0) Abr 05 2018

E despois de Semana Santa que tempo ven?

Posted: under O tempo.

Pasou a Semana Santa e voltamos á normalidade, non si? Despois de cumprirse en gran medida as predicións feitas toca ver o que ven para esta semana, se hai continuación no da fin de semana ou voltamos ás andadas coa chuvia, verdade? Agora cho conto.

O que temos hoxe sobre a península Ibérica é bastante nebulosidade, especialmente polo norte e noroeste que mesmo deixaron algunhas precipitacións ao longo do día de hoxe, tal e como podes ver na seguinte imaxe de satélite de primeira hora desta tarde.

Pois ben, o conto é que as borrascas voltarán a achegarse á península e, polo tanto, voltarán as nubes e as precipitacións. A primeira delas xa está con nós e detrás virá outra que, coas súas frontes asociadas, daránnos un martes e mércores con moita nube e chuvia canto máis ao oeste estemos e menos cara o sur e leste, tal e como podes comprobar nas seguintes imaxes do modelo GFS previstas para a medianoite do martes ao mércores: á esquerda os campos de isóbaras e nebulosidade e á dereita o campo de precipitación. A cota de neve estará por riba dos 1000 metros, así que por riba desa altitude a precipitación poderá ser en forma de neve.

Xa o xoves teremos unha tregua e as altas presións mandarán deixando un día tranquilo con baixa probabilidade e precipitación á espera de novas frontes no seguintes días, pero iso xa cho conto o xoves. Podes ver esta tregua nas imaxes do modelo previstas para o mediodía deste xoves para as mesmas variables de antes.

Polo menos non irá tanto frío aínda que as temperaturas baixen un chisco ata o xoves. Ese xoves voltarán a subir. Iso si, quizais e note un pouco máis de frío porque o vento estará presente durante toda esta semana en toda a península, pero notándose sobre todo polo norte.

Si, despois dun sábado e domingo un pouco tranquilos coa chuvia, ésta volta a Galicia con xeito ata o xoves. Xa hoxe luns choveu en moitos puntos e así o seguirá a facer mañá martes e mércores: por momentos máis continuamente, outros máis tipo chuvasco e algúns intres de tregua. Para o xoves tranquilidade e mesmo bastante sol. Coa chuvia tamén virá vento, así que nos vindeiros días tocará sufrilo e de xeito notorio. Tamén teremos lixeira baixada de temperaturas mañá e pasado para recuperarse o xoves.

Como les, seguimos co carrusel de borrascas no comezo da semana á espera da tregua do xoves dándonos un día bastante primaveral. O que veña despois xa o veremos.

Comentarios (0) Abr 02 2018

E o tempo para esta Semana Santa é…

Posted: under O tempo.

Xa esta aquí a Semana Santa e, se non o estás xa, terás uns cantos días para gozar sen facer nada e de seguro que xa estás a voltas co tempo que terás, non si? Un adianto xa cho din o xoves, pero agora entrarei un pouco máis en detalle dado que a fiabilidade é algo maior, así que non me entreteño e vou a elo.

De momento o que temos sobre a península Ibérica son as altas presións que deixan un ceo case despexado, agás polo norte onde as nubes aínda seguen a mandar e mesmo deixaron algo de chuvia polo Cantábrico; tal e como podes ver na seguintente imaxe de satélite de primeira hora desta tarde.

Pois ben, isto non vai durar moito xa que a partir do mércores voltarán as mandar as baixas presións con borrascas achegándose a península e traendo con elas as súas frontes. Así, o que temos é unha xornada de mañá martes e gran parte do mércores relativamente tranquilas, con bastante sol e baixa probabilidade de chuvia, agás se estás polo noroeste por onde xa este mércores pola tarde entrará a primeira fronte traendo nubes e precipitación, tal e como podes ver nas seguintes imaxes do modelo GFS previstas para a medianoite deste martes ao mércores para os campos de isóbaras e nebulosidade (esquerda) e o campo de precipitación (dereita).

Xa, a partir do mércores, ábrese a veda ao paso de distintas frontes que farán que o ceo peninsular estea anubrado e con precipitacións, máis probables e frecuentes canto máis ao oeste e menos canto máis preto do Mediterráneo e así estaremos ata o domingo. Podes ver isto resumido nas seguintes imaxes do modelo probabilístico de medio prazo de MeteoGalicia para a probalibilidade de que se acumulen 0.5 l/m2 en 24 horas (esquerda) e a probabilidade de que sexan 5 l/m2 os acumulados (dereita). Hai que ter en conta a cota de neve dado que se colocará no final da semana entre os 600 e 800 metros, así que por riba desas altitudes a precipitación que caia pode ser en forma de neve.

Coas temperaturas imos ter de todo porque mañá e pasado prometen ser máis que agradables e xa logo máis frías nos días festivos, de xoves a domingo. Unicamente polo Mediterráneo estarán máis cálidos.

Coa entrada das frontes aumentará a intensidade do vento e nalgúns puntos poderá ser con certa intensidade. Mentres non chegan as frontes a partir do mércores, estaremos tranquilos con pouco vento.

Si, tivemos hoxe e temos mañá e parte do mércores para gozar sen chuvia aquí en Galicia porque despois será un non parar de frontes e, polo tanto, moita nube con precipitación e vento, o habitual destas últimas semanas por este país: momentos con chuvia máis continua, momentos de chuvascos e ata momentos tranquilos. Mañá e pasado non fará moito frío, xa logo toca baixada de temperaturas e máis frío, coa conseguinte baixada da cota de neve e que nas montañas de Lugo e Ourense volva a aparecer a neve. Como dicía, o vento irá aumentando a súa intensidade, así que haberá que estar atentas/os á súa evolución e os posibles avisos que conleve, xunto cos de precipitación.

Como les, a predición do tempo para esta Semana Santa non invita ao optimismo en canto a sol e calor, mais ben o contrario dado que as nubes e a chuvia serán as protagonistas especialmente nos días festivos. De todos os xeitos, estate pendente de calquer actualización que modifique este panorama porque aínda é cedo para que o que pase a partir do xoves-venres sexa de todo fiable.

Comentarios (0) Mar 26 2018

Hoxe é o noso día!!!

Posted: under O tempo.

Hoxe non é un día calquera para os que nos adicamos á meteoroloxía. Como cada 23 de marzo desde 1950, a Organización Meteorolóxica Mundial (OMM) xunto con todos os que formamos parte da comunidade meteorolóxica internacional, celebramos este día como o «Día Meteorolóxico Mundial», o noso día. Escolleuse esta data cando se creou a Organización Meteorolóxica Mundial despois da Convención da Organización Meteorolóxica Mundial, sendo, ao ano seguinte, designada como unha axencia especializada das Nacións Unidas.

Mediante un tema escollido “ad hoc” cada ano, fanse xirar sobre él todas as actividades que os distintos organismos meteorolóxicos organizan no día de hoxe. Este ano o lema é “LISTOS PARA O TEMPO, PREPARADOS PARA O CLIMA”. Son moitos os fenómenos meteorolóxicos que ocorren na atmosfera a diario e que, segundo os informes do IPCC sobre o Cambio Climático, aumentarán a súa intensidade e frecuencia nos vindeiros anos. De aí que temos que estar pendentes do tempo actual que nos pode mostrar, xunto coas predicións climáticas, como será no futuro e prepararnos para él tomando as decisións que haxa que tomar. Neste enlace (https://ane4bf-datap1.s3-eu-west-1.amazonaws.com/wmocms/s3fs-public/ckeditor/files/WMD2018_foldout_es.pdf) da Organización Meteorolóxica Mundial tes máis información sobre este día.

Como xa é tradición estes últimos anos, aquí en MeteoGalicia celebramos este día cunha xornada de portas abertas ao público. Xa están sempre abertas, pero hoxe coa posibilidade de dedicarlle un pouco máis de atención explicando o noso traballo diario máis polo miúdo, comezando en ver como facemos as predicións que podedes ver na nosa páxina web e transmitimos despois a través das nosas intervencións nos distintos medios de comunicación nos que participamos. Tamén explicaremos que son e como funcionan os modelos numéricos que xeran os mapas que se interpretan e dan lugar ás predicións. Mostraremos como recollemos os datos das estacións meteorolóxicas que temos espalladas por todo o país e os datos de satélite e radar meteorolóxicos, etc.

E dito isto, só me queda desexarche un moi feliz día de hoxe e que te acordes de nós durante todo o ano e non só porque non atinemos nas nosas predicións e tentes coidar este planeta no que vivimos.

Comentarios (0) Mar 23 2018

Chuvia no comezo de Semana Santa?

Posted: under O tempo.

Estamos ás portas da Semana Santa despois duns días tranquilos no meteorolóxico e rematando esta semana de paixón que temos as e os do tempo para tentar facer unha predición para a vindeira semana, así que, como che dixen o luns, hoxe tentarei darche unha idea do que nos espera a vindeira semana, pero antes toca ver que hai para esta fin de semana.

Hoxe tocou día tranquilo, de moito sol, agás polo norte, sobre a península, pero xa entrando as nubes polo noroeste, tal e como podes ver na seguinte imaxe de satélite de primeira hora desta tarde.

Pois ben, a situación vai cambiar nos vindeiros días. Arestora xa temos a borrasca chegando ao norte peninsular e que nos dará un venres de nubes e precipitación en gran parte do territorio peninsular con menor probabilidade canto máis ao sur e leste, tal e como podes ver isto nas seguintes imaxes do modelo GFS previstas para mañá ao mediodía para os campos de isóbaras e nebulosidade (esquerda) e o campo de precipitación (dereita).

Na fin de semana, coa borrasca xa na Bretaña francesa a situación cambia un chisco e as nubes e a súa precipitación asociada, chuvia e neve ao redor dos 1000 metros, quedarán máis restrinxidas ao norte e no resto da península máis sol aínda que con algunha que outra nube. Podes velo nas seguintes imaxes do modelo GFS previstas para a medianoite do sábado ao domingo para os mesmos campos de antes.

A temperatura? Fría, como estes días. Non haberá moitos cambios con respeito ás destes días. Quizais lixeiro aumento polo noroeste mañá venres.

O que si teremos é vento. Practicamente estará presente, e con bastante intensidade en moitos puntos, durante todos os vindeiros días con tendencia a remitir no domingo.

Si, xa volve a chuvia a Galicia. A estas horas, cando esteas lendo isto, xa teremos algo de chuvia polo oeste e que quedará durante todo o venres de forma continua e xeitosa. Xa na fin de semana veñen os chuvascos o sábado e un domingo de nubes, pero xa con moitos menos chuvascos, por non dicir nulos. Seguiremos con estas temperutas un pouco frescas e con vento, bastante vento ata o domingo que será cando remita.

E aquí vou cun adianto de como pode vir a Semana Santa. Ten en conta que a fiabilidade aínda é baixa, tómao como unha tendencia e estate pendente sas distintas actualizacións, a miña o luns. E dito isto, como podes ver na seguinte imaxe do modelo probabilístico que temos en MeteoGalicia, vese como o comezo de semana será relativamente tranquilo con baixa probabilidade de chuvia e xa mediada a semana aumentará a inestabilidade de oeste a leste. No comezo da semana andaremos con temperaturas agradables para logo baixar no remate da Semana Santa.

Como les, toca inestabilidade nesta fin de semana á espera de como evoluciona a atmosfera e ver como ven a Semana Santa cuxo avance acabas de ler.

Comentarios (0) Mar 23 2018