Tempo en Semana Santa?

Posted: under O tempo.

Ben, xa estamos cheirando a Semana Santa e ti ansiosa/o en saber que tempo fará, non si? Nesta nosa semana de paixón aínda non está claro o tempo, pero algo che adiantarei, así que non me lio máis e paso a contarche.

Xa podes imaxinar como ven a imaxe de satélite, verdade? Pois como ves, con moi pouca nube sobre a península Ibérica deixando un día moi solleiro.

Pois ben, esta situación anticiclónica vai a continuar nos vindeiros días. Deste xeito, o tempo con moito sol e pouca nube vai seguir sendo o protagonista. Cara a finais da fin de semana poderían aparecer algunhas nubes polo este e mesmo cunha pequena probabilidade de chuvia, pero nada importante. Podes ver isto nas seguintes imaxes do modelo GFS previstas para o sábado ao mediodía para os campos de isóbaras e nebulosidade (esquerda) e o campo de precipitación (dereita).

De temperatura pasaremos calor, quizais un chisco máis altas do normal nesta época do ano, especialmente polo sur.

O vento estará tranquilo, agás polo leste e sur onde se notará moito máis durante os vindeiros días.

E si, a chuvia non vai a aparecer en Galicia, así que o tempo solleiro e con calor vai a manterse ata comezos de semana e co vento tendendo a diminuir a súa intensidade.

E a Semana Santa, que? Pois a día de hoxe aínda hai bastante incertidume sobre como evolucionará, pero parece que o escenario máis probable é que a probabilidade de chuvia é baixa en xeral, sendo máis problable, dentro desta baixa probabilidade, canto máis ao oeste peninsular, tal e como che mostro na seguinte imaxe da probabilidade de chuvia a medio prazo que nos da o ensemble de MeteoGalicia. Isto é o que che podo adiantar a día de hoxe e emprázoche ao luns para unha actualización máis centrada nos días festivos de finais da vindeira semana.

Como les, segue a estabilidade e parece que, aínda que se perda algo na Semana Santa, non vai a ser moito e o tempo tranquilo e con bastante sol estará garantido como mínimo ata comezos da semana.

Comentarios (0) Abr 06 2017

Verán de novo?

Posted: under O tempo.

Xa temos aquí o mes de abril e parece que comeza tranquilo, con sol e temperaturas máis que agradables polo visto no día de onte e hoxe, non si? Pero, ata cando durará isto? Agora cho digo.

Como ves na seguinte imaxe de satélite de primeira hora desta tarde, as nubes practicamente están ausentes sobre o ceo peninsular, salvo algunha nube por aí solta e algunhas altas estropeando o ceo completamente azul.

Pois ben, esta situación manterase durante a semana. As altas presións seguirán mandando sobre a península e, polo tanto, a estabilidade será a tónica predominante. Así, o ceo pouco anubrado ou despexado estará garantizado, agás polo norte onde sí aparecerán algunhas nubes e mesmo poderían deixar algo de chuvia por Cantabrio e Euskadi na metade da semana. Non se descarta que polo sueste poida tamén aparecer algo de chuvia. Podes ver todo isto nas seguintes imaxes do modelo GFS previstas para o vindeiro mércores ao mediodía para os campos de isóbaras e nebulosidade (esquerda) e precipitación (dereita).

As temperaturas seguirán a ser agradables, especialmente polo centro e sur da península, cunha lixeira tendencia descendente polo norte segundo avance a semana.

O vento si dará a lata esta semana. Será pola zona do estreito de Xibraltar onde se notará máis xunto co norte.

Si, descansa a chuvia en Galicia. Xa onte e hoxe foron un adianto do que se nos ven no tempo desta semana con moito sol, algunha nube alta, sen chuvia, néboa matinais nalgúns do interior, e temperaturas agradables, mesmo calorosas polo interior no remate da semana. Iso si, vento haberá e notándose na metade e final da semana.

Como les, toca estabilidade e tempo primaveral, lonxe de chuvia e frío; así que a gozar del que a Semana Santa está aí a volta da esquina e vai ti saber que tempo virá (o xoves caerá un adianto).

Comentarios (0) Abr 03 2017

Rematou a Media Maratón por este ano

Posted: under Deportes.

Fai dúas semanas estaba contándoche que afrontaba a miña terceira Media Maratón de Zamora e empraceiche a ler a posteriori como me foi e por iso mesmo estou agora escrindo isto.

Como dicía os obxectivos eran rematar e condicións físicas decentes e en menos de 2 horas e volveronse a cumprir estes obxectivos, pero con algún matiz que me deixou con un pouco mal sabor de boca. Ese matiz foi o de non poder baixar o tempo do ano pasado. Si, fixen case medio minuto máis sendo o tempo total de 1 hora 58 minutos e 27 segundos. E agora é cando pensas, e que máis da? Só é medio minuto? En parte tes razón, pero un sempre quere mellorar ano tras ano e este non foi posible. Aínda así, despois dos problemas coa caída que tiven no proceso de entrenamento, impedindo un chisco un entreno normal, non teño queiza grande do resultado final.

En resumo, a carreira foi como a dos anos anteriores, de máis a menos. Os primeiros quilómetros quizais os fixen máis rápido do que debería para logo acabar pagandoo en certa medida no meu tramo “especial” dos últimos 7 quilómetros que segue a atragantarseme. Iso si, algo bo, por dicilo así, foi que puiden rematar a carreira esprintando e adiantando á xente no último quilómetro.

Toca tomar nota e a ver se dunha vez corrixo os defectos que teño nas miñas carreiras. Sigo a baixar peso e entreno máis; non só de cara ao ano que ven nesta mesma Media Maratón senón tamén para o resto de carreiras que me quedan neste 2017.

Non quero rematar estas liñas se agradecer de corazón ao meu amigo Javi que me fixo de “liebre” e, a pesar dos seus problemas nos xeonllos que lle impiden correr con regularidade, quixo acompañarme ao longo do recorrido dándome ánimos e exprimíndome, sobre todo ao final, para que puidera cumplir os meus obxectivos.

Novamente agradecer a toda a xente que saiu ás rúas zamoranas a darnos azos nesa boa mañá de sol e calor.

Ben, ata aquí remata a Media Maratón por este ano e xa preparando os novos retos durante este novo ano “runner” e que a través das miñas redes sociais iredes vendo.

Comentarios (0) Abr 02 2017

E de tempo como andaremos?

Posted: under O tempo.

Estamos rematando este mes de marzo que no meteorolóxico nos trouxo de todo: desde un amago de verán ata un amago de inverno duro. Agora toca ver como comeza o mes de abril e se fai caso ao dito de “en abril, augas mil”. De momento só che conto como ven esta primeira fin de semana do mes.

Se ves a seguinte imaxe de satélite de primeira hora desta tarde verás como o sol é o protagonista xeral sobre a península, coa excepción do rincón noroeste onde as nubes son as que mandan e mesmo xa están a deixar chuvia.

Pois ben, a situación vai cambiar nas vindeiras horas coa entrada da fronte que xa podes ver na imaxe anterior. Durante esta madrugada e mañá venres recorrerá todo o norte peninsular deixando o ceo nubrado e con precipitacións, algunhas delas importantes e en forma de treboada. Xa para o leste e sur estará moito máis tranquilo, aínda que con nubes. Podes ver isto nas seguintes imaxes do modelo GFS previstas para mañá ao mediodía para os campos de isóbaras e nebulosidade (esquerda) e o campo de precipitación (dereita).

Xa na fin de semana a situación irase compoñendo e aínda que polo norte quedarána as nubes coa chuvia, no centro e sur xa máis sol con continuación na xornada do domingo onde en practicamente toda a península a estabilidade será a tónica dominante e, polo tanto, con baixa probabilidade de precipitación malia algunha nube. O resumo visual disto telo nas seguintes imaxes do modelo previstas para a medianoite do sábado ao domingo para os mesmos campos anteriores.

Iso si, tralo paso destas frontes entra aire frío e fai que as temperaturas baixen e deixen estes valores tan agradables de hoxe e mañá, sendo xa máis frescas na fin de semana.

O vento estará presente por todo o norte peninsular, notándose principalmente polo nordeste durante a fin de semana.

E si como xa estás a comprobar, despois de dous días de relativa tranquilidade, volta a chuvia a Galicia e por momentos importantes nesta vindeira madrugada e mañá pola tarde, quedando o tempo intermedio con algún que outro chuvasco. Xa a partir da tarde do sábado a situación irase compoñendo e o domingo promete ser tranquilo. Con isto tamén teremos un pouco máis de fresco dado que as temperaturas baixarán mañá e o sábado, recuperándose un chisco o domingo. O vento cesará tamén o domingo, pero mentres tocará sufrilo un par de días.

Como les, aínda queda algo de tempo perralleiro para mañá e o sábado polo norte, pero xa logo todo se axeita para rematar o domingo con día bastante xeitoso.

Comentarios (0) Mar 30 2017

Tranquilizándose o tempo?

Posted: under O tempo.

Estamos xa rematando este mes de marzo que tanto contraste meteorolóxico nos está a dar, así que agora toca ver que nos depara esta semana a atmosfera, así que paso a contarcho agora mesmo.

Como podes ver na seguinte imaxe de satélite de primeira hora desta tarde, as nubes son as protagonistas sobre a península Ibérica cubríndoa na súa meirande parte e mesmo deixando precpitacións en moitos puntos dela.

Pois ben, xa che digo que esta inestabilidade vai a ir rematando polo menos uns días. A partir de mañá martes a atmosfera estabilizarase e o sol será moito máis protagonista que as nubes, aínda que seguirán presentes, pero con moi baixa probabilidade de chuvia, tal e como mostran as saídas do modelo GFS para este mércores ao mediodía para os campos de isóbaras e nebulosidade (esquerda) e o campo de precipitación (dereita).

Xa o xoves comeza a cambiar o conto co achegamento dunha profundo borrasca ás illas británicas e cuxa fronte asociada comezará a afectar á península polo oeste na tarde dese día e logo se estenderá ao resto, pero iso xa cho conto mellor o xoves.

En canto ás temperaturas, éstas irán en ascenso progresivo segundo avancen os días da semana, notándose moito máis nas diurnas, non sendo tanto nas nocturnas.

De vento a península estará relativamente tranquila, agás dúas zonas: o noroeste e, sobre todo, polo sur onde si se notará e máis, especialmente esta última zona.

Si, chega unha tregua ao tempo en Galicia deixándonos un martes e mércores e case o xoves. Aínda que as nubes seguirán presentes, serán menos e con baixa probabilidade de chuvia ata o xoves pola tarde que será cando, coa entrada da fronte, aumenta a nebulosidade e trae consigo chuvia. Polo menos non irá frío porque as temperaturas irán subindo, malia ao vento que aportará esa parte de sensación de frío maior que o que nos marque o termómetro.

Como les, toca máis tranquilidade e estabiliade ao tempo da que estivemos a ter en días e semanas pasadas, así que a gozar del á espera de novos cambios o día que cheguen.

Comentarios (0) Mar 27 2017

Primavera? Non, case inverno…

Posted: under O tempo.

Que? Estamos en primavera, non si? Pero, a que non o parece? Pois non, non o parece porque como xa ben saberás nevou en moitos lugares, mesmo en Madrid capital. Xa o dicía o meu avó Ramón, “aínda queda a neve do cuco”. E canto vai durar isto? Marchará este frío? Agora cho digo.

O que temos enriba son os restos do paso do sistema frontal do martes/mércores deixando chuvascos espallados por case toda a península en forma de chuvia e neve en moitos puntos, tal e como podes ver na seguinte imaxe de satélite de primeira hora desta tarde.

Pois ben, esta situación de baixas presións vai a continuar nos seguintes días. Deste xeito, a inestabilidade continuará con moita nube sobre a península Ibérica e deixando precipitacións que serán en forma de neve por riba dos 500/600 metros no día de mañá e subindo progresivamente ata os 1000 metros no remate da fin de semana. Unicamente polo sueste se librarán disto porque malia as nubes, a probabilidade de precipitación será menor. Deixoche as imaxes do modelo GFS previstas para o vindeiro sábado ao mediodía para que te fagas mellor á idea disto que che acabo de contar: á esquerda os campos de isóbaras e nebulosidade e á dereita o campo de precipitación.

O frío este de marzo aínda continuará uns días. Iso si, con lixeira tendencia ao ascenso, especialmente polo sur. Será o domingo xa cando se note máis o ascenso en case toda a península.

O vento seguirá presente, por momentos máis e por momentos, menos; pero sin librarnos del na fin de semana e facendo que a sensación de frío sexa un pouco maior.

E si, en Galicia imos seguir con este tempo tan farragoso de agora chove, agora non (nalgúns sitios neva), ata se ve o sol. É dicir, a inestabilidade permanece e os chuvascos seguirán presentes, sendo por momentos máis probables (mañá venres e o domingo pola tarde) e por outros menos (sábado e domingo pola mañá), pero con ambiente húmido. O que si irán subindo as temperaturas un chisco, tampouco moito; manténdose o vento presente durante toda a fin de semana.

Como les, mantense este tempo máis de inverno que de primavera durante a fin de semana, así que tocará abrigarse e andar co paraugas a man.

Comentarios (0) Mar 23 2017

Festexando o noso día!!!

Posted: under O tempo.

Hoxe, como todo os 23 de marzo desde 1950, a xente relacionada coa meteoroloxía e baixo o amparo da Organización Meteorolóxica Mundial (OMM) estamos de festa celebrando o “Día Meteorolóxico Mundial”.

Mediante un tema escollido “ad hoc” cada ano é sobre o que se fan xirar todas as actividades desenvolvidas este día. Neste ano o lema é “ENTENDENDO AS NUBES” pola transcendencia que teñen non só nas predicións e os avisos meteorolóxicos, senón tamén polo seu vital papel no ciclo da auga e todo o sistema climático. Todo isto sen ter en conta, desde o punto de vista estético e visual, as súas formas e como “decoran” o ceo dando unhas imaxes expectaculares. Se queres máis información, só tes que pasarte por esta web da OMM (https://public.wmo.int/es/D%C3%ADa-Meteorol%C3%B3gico-Mundial-2017) para o día de hoxe e terás moita máis información sobre este tema.

Outro ano máis, en MeteoGalicia abrimos (aínda máis) as nosas portas para que poidas coñecer de primeira man o noso traballo diario; tanto desde o punto de vista de facer as predicións e subilas á web, pasando pola execución dos modelos numéricos de predición atmosférica e oceanográfica, antendendo aos medios de comunicación, recollendo datos das estacións meteorolóxicas e un largo etcétera de traballo diario.

E xa, para rematar, só me queda desexarche un moi bo día e teñas en conta o noso traballo meteoróxico no teu día a día, tanto para ben como cando erremos nas predicións.

Comentarios (0) Mar 23 2017

Volve o inverno?

Posted: under O tempo.

Desde esta mañá estamos na primavera, non si? E no tempo, que? Segundo esta fin de semana case en verán, pero parece que algún cambio se albisca por aí e que agora paso a contarche.

Polo momento o que manda é o sol sobre a península, salvo polo noroeste onde xa parece que algo tende a cambiar, tal e como podes ver na seguinte imaxe de satélite de primeira hora desta tarde.

Pois ben, haberá cambios. E importantes dado que unha profunda borrasca vaise achegar ao norte peninsular segundo avance a semana. E que conleva isto? Pois aumento da nebulosidade que traerá precipitacións, descenso de temperaturas e da cota de neve. Así, todo ese cóctel vai facer que o inverno chegue de novo á península anubrandose o norte peninsular, chegando ao centro na metade e final de semana, con precipitacións que serán en forma de neve en altitudes próximas aos 500 metros na xornada do xoves. Mentres todo isto ocorre polo norte e centro, no resto da península estarase máis tranquilo porque só aparecerán nubes e a probabilidade de chuvia será baixa. Podes ver isto resumido nas saídas do modelo GFS previstas para o vindeiro mércores ao mediodía para os campos de isóbaras e nebulosidade (esquerda) e precipitación (dereita).

Ao mesmo tempo teremos a entrada dunha masa de aire frío que enfriará as temperaturas dun xeito importante en todo o territorio peninsular, pero especialmente polo norte facendo que baixe a cota de neve e se vexa folerpas, e máis que folerpas, en pleno mes de marzo. Podes apreciar claramente este descenso nas seguintes imaxes do modelo para o campo de temperaturas: á esquerda as de hoxe ao mediodía e á dereita as previstas para o vindeiro xoves a esa mesma hora.

E como o vento non quería faltar a esta festa, pois tamén fará acto de presenza aumentando a súa intensidade a medida que pasa a semana.

Si, toca cambio de tempo en Galicia e volta o frío, a chuvia, a neve e o vento. Xa no día de hoxe as nubes estiveron cubrindo o ceo do país e así seguirá durante esta semana e deixando chuvia e neve que no xoves podería verse en localidades sobre os 400-500 metros de altitude. A baixada das temperaturas notarase e ben, voltando o frío, nada que ver coas temperaturas calorosas destes días pasados e que se notará aínda máis co aumento da intensidade do vento.

Como les, volta de novo o inverno co frío e a chuvia/neve neste comezo de primavera, así que toca abrigarse e ter coidado.

Comentarios (0) Mar 20 2017

Repito media maratón!!!

Posted: under Deportes.

Si, din que non hai 2 sen 3 e iso vou facer eu correndo a media maratón de Zamora outra vez máis. E aquí estou, acabando de prepararme para comezar a dar zapatilla polos 21.097 metros que separan a Praza Maior de Zamora do Polideportivo Municipal.

Os motivos seguen a ser os mesmos que cando a fixen fai 2 anos: o seguinte paso cando levas correndo moito tempo, o ser máis sinxela que outras que hai nesta época do ano, que a miña parella é zamorana e tamén engado o feito de ter un obxectivo que me incite a sair a correr e non quedarme tirado sen facer deporte.

O obxectivo non deixa de ser o mesmo que nas dúas anteriores edicións: rematala en condicións físicas decentes e en menos de 2 horas. A intención era máis arriscada, pero acontecementos varios (sempre hai algo) impediron que perdera todo o peso que necesitaría, así como entrenar un pouco máis e en mellores condicións por culpa dunha caída que me deixou o xeonllo dereito fastidiado unhas semanas cunha boa ferida. Aínda así, chego con máis quilómetros nas pernas que o ano pasado e creo que cunha pouca mellor forma a pesar de non poder quitarme eses quilos de máis que teño.

Non me lío máis, remato de por todo en orde, quento un pouco e a correr.

Emprázote á semana que ven para ler como me foi.

Comentarios (0) Mar 19 2017

Máis sol e calor?

Posted: under O tempo.

Estamos rematando a semana e a tranquilidade parece que vai chegando a toda a península, porque nalgúns puntos foi unha semana bastante movida no meteorolóxico. E que? Como ven o conto para a fin de semana? Pois ven así.

Na seguinte imaxe de satélite de primeira hora desta tarde podes ver como o sol é o protagonista sobre a península, agás algunhas nubes polo suroeste.

Pois ben, o conto este non vai ter moitas variacións nos vindeiros días. As altas presións seguirán predominando sobre a península Ibérica aportando moita estabilidade. Isto traducirase en moito sol e con temperaturas máis que agradables. Unicamente polo suroeste poderán aparecer nubes e mesmo deixar algo de chuvia mañá e con menor probabilidade na fin de semana, tal e como podes ver nas seguintes imaxes do modelo previstas para o vindeiro sábado ao mediodía para os campos de isóbaras e nebulosidade (esquerda) e o campo de precipitación (dereita).

Si, como xa che dixen, fará calor. Unha pouca máis que a que estamos tendo estes días, así que temos por diante unha fin de semana próxima ao verán e ademáis con cada vez menos vento, agás polo sur onde si seguirá presente durante a fin de semana.

E traquila/o porque a chuvia non vai facer acto de presenza en Galicia nos seguintes días. Segue a estabilidade e salvo algunha nube polo norte e algunha néboa polo interior, o ceo azul está practicamente asegurado no noso país. Ademais veñen temperaturas altas para esta época do ano, por riba dos 20º en moitos puntos do suroeste e interior, xunto con moi pouco vento.

Como les, temos por diante unha fin de semana caralluda con isto do tempo, así que tocará gozar dela, algúns ata facendo deporte duro como este que vos escribe.

Comentarios (0) Mar 16 2017