Tempo de chuvia?

Posted: under O tempo.

Xa pasou o furacán Ophelia, pero a noticia de hoxe non é esa. É a dos incendios que nos están a afectar e que coa “axuda” deste fenómeno meteorolóxico e varios factores máis deixaron o desastre que deixaron no noso país. Agora esperando pola chuvia con xeito, non só para apagar estes lumes, senon tamén para encher embalses e refrescar o ambiente, non si? Xa che conto como ven a semana en nada.

O que temos sobre a península é a metade oeste con máis nubes e algo de chuvia e a metade leste máis despexada, tal e como podes ver na seguinte imaxe de satélite de primeira hora desta tarde.

Pois ben, agora si que o conto vai cambiar. Coa chegada e paso de Ophelia o anticiclón retírase cara o centro do Atlántico e vaise abrir a veda ao paso dos sistemas frontais que irán chegando ao longo desta semana. Polo tanto, espéranos unha semana de bastantes nubes e chuvia sobre a península Ibérica, máis probable e intensa polo oeste, pero tamén caendo algo polo leste. Podes ver un resumo disto nas seguintes imaxes do modelo GFS prevista para o vindeiro mércores ao mediodia para os campos de isóbaras e nebulosidade (esquerda) e o campo de precipitación (dereita).

Con isto tamén chega a baixada de temperaturas. Por fin marcha a calor esta case extraordinaria de outubre e acadaranse temperaturas máis acaídas para esta época do ano.

E neste menú de cambio de tempo non podía faltar o vento que comezará a notarse un pouco máis, especialmente polo noroeste e norte.

Si, chega a chuvia a Galicia. Xa hoxe caeu algo e así seguirá durante toda a semana. O paso de varias fronte deixará bastante nube e chuvia con algún que outro intervalo de menos nubes e algo de sol, pero en xeral será unha semana de chuvia no tempo que boa falta fai. Tamén o será máis fresca coa baixada das temperaturas a valores de outubro e ademáis ventosa porque teremos que a súa intensidade irá en aumento, non tanto como na fin de semana, pero si o suficiente para que moleste, sobre todo no litoral.

Como les, chega a tan ansiada chuvia á península Ibérica e con ela xunto coa baixada térmica, refresca o tempo que boa falta facía.

Comentarios (0) Out 16 2017

Ponte calorosa?

Posted: under O tempo.

Si, xa sei que hoxe non é xoves, pero dado que estamos en véspera dunha ponte, quen poida gozar dela; hoxe adianto a miña predición para que a teñas en conta se planeas algo para os vindeiros días.

De momento, como podes ver na seguinte imaxe de satélite desta mesma tarde, seguimos con este verán en pleno outubro cun ceo con moi poucas nubes e moitos con quentando e ben, máis do que debería segundo a época do ano.

Pois ben, a situación sinóptica vai seguir sendo a mesma coas altas presións sobre a península Ibérica asegurándonos unha ponte de moito sol e temperaturas calorosas coa única diferenza polo leste, xa entrada a fin de semana, onde poderian aparecer algunhas nubes e mesmo algo de chuvia. Podes ver isto resumido nas imaxes do modelo GFS previstas para o próxima medianoite do venres ao sábado para os campos de isóbaras e nebulosidade (esquerda) e o campo de precipitación (dereita).

Como dicía, as temperaturas seguirán con valores por riba da media, calorosas en xeral, especialmente polo centro e sur peninsulares.

Ademáis, haberá pouco vento en liñas xerais. Unicamente polo sur aumentará algo durante a fin de semana, pero non moito.

E si, tamén en Galicia gozaremos do sol e a calor nos vindeiros días facendo que a ponte no meteorolóxico sexa agradable. E ademais con ausencia de vento.

Agora ben, todo isto remata no comezo da semana que ven dado que unha borrasca, que a día de hoxe é a tormenta tropical Ophelia, como ves na imaxe superior, vaise ir achegando cara a península Ibérica segundo as previsións que ven na imaxe inferior.

Aínda é moi cedo para dicir se nos afectará ou non dado que a incertidume da súa traxectoria é moi alta, tal e como podes ver nas seguintes imaxes do ensemble de medio prazo que temos en MeteoGalicia: á esquerda o que din os seus membros para o domingo ao mediodía e á dereita o que din para a medianoite dese domingo ao luns. Se queres ter información de primeira man da súa evolución nos vindeiros días podes vistar a web do National Hurricane Center (http://www.nhc.noaa.gov/).

Como les, temos unha ponte moi tranquila e xeitosa no tempo á espera de que a semana que ven comecen os cambios, ou iso é o que os modelos meteorolóxicos parece que nos queren mostrar.

Comentarios (0) Out 11 2017

Chuvia? Será esta semana?

Posted: under O tempo.

Ben, segue sen chover e facendo calor, non tanta coma se estivesemos en verán, pero para estarmos en outono chégalle ben, non si? Desexando que chova dunha vez, verdade? Imos ver se toca esta semana que remata en ponte.

Hoxe seguimos coa mesma tónica destes días pasados e que non é outra cousa que un ceo con moi pouca nube e con moito sol sobre a peninsula Ibérica, tal e como podes ver na seguinte imaxe de satélite desta mesma tarde.

Pois ben, non se albiscan cambios nos vindeiros días na atmosfera peninsular. Si, continuarán as altas presión afectándonos e, polo tanto, aportando moita estabilidade e moito sol. Algunha nube podería aparecer para estropear un ceo completamente azul, pero sen importancia. Da chuvia nada, sen novidades a día de hoxe. O resumo visual disto pódelo ver nas seguintes imaxes do modelo GFS previstas para o mediodía do vindeiro mércores para os campos de isóbaras e nebulosidade (esquerda) e o campo de precipatición (dereita).

E si, seguiremos con esta calor durante uns días máis camiño do outubro máis caloroso dos últimos anos que unido a ausencia practicamente total de vento fará que a sensación sexa maior.

Si, seguirá sen chover en Galicia. Aínda que non o creas, outra semana máis de sol e calor neste país que din que é da chuvia, pero este mes de outubro non vai facer honra diso porque, como dicía temos por diante unha semana solleira con temperaturas rozando os 30º en moitos puntos e pouco vento dando unha sensación de case verán.

Como les, máis días de sol e calor en outubro, dando lugar a un verán máis que outono; así que tocará esperar aínda uns días a esa tan demandada chuvia. Veremos se o mércores, antes da ponte, che traio algún cambio no tempo.

Comentarios (0) Out 09 2017

Outono ou verán?

Posted: under O tempo.

Ben, estamos a xoves e seguimos con este tempo tan caloroso, verdade? E ti pedindo auga, non si? Xa sabemos que a seca é grande e ademáis fai falla, pero, virá? Agora cho digo.

De momento hoxe seguimos coas altas presións e moito sol sobre a península Ibérica, tal e como podes ver na seguinte imaxe de satélite desta mesma tarde.

Pois ben, sinto dicirche, así de golpe que a chuvia parece que, en liñas xerais, non vai facer acto de presenza nos vindeiros días. As altas presións seguirán firmes sobre a península aportando estabilidade, así que o sol será o que mande. Poderían aparecer algunhas nubes polo sueste e mesmo deixar algún chuvasco na fin de semana. Deixoche as seguintes imaxes do modelo GFS previstas para o vindeiro sábado ao mediodía dos campos de isóbaras e nebulosidade (esquerda) e o campo de precipitación (dereita) para que te fagas unha mellor idea de como estará o tempo.

Si, seguirá a calor destes días con tendencia a ir a menos segundo avancen os días.

O vento non dará problemas, agás na zona do val do Ebro e no sur peninsular onde a súa intensidade será un pouco maior.

Si, Galicia gozará dunha fin de semana de sol e calor. A chuvia segue a resistirse, así que tocará un tempo moi semellante ao de hoxe ao longo de toda a fin de semana, tanto en valores de temperatura coma co vento, notándose máis no litoral norte.

Como les, toca unha fin de semana case máis de verán que de outono, así que, mentres non cambia haberá que gozar dela.

Comentarios (0) Out 05 2017

Sol e calor en outubro?

Posted: under O tempo.

Xa estamos en outubro e comezou quente, non si? E seguirá así? Agora che saco de dúbidas para que sepas con detalle como ven a semana.

Como continuación da fin de semana, as nubes son pouco protagonistas no día de hoxe sendo o sol o que manda, tal e como podes ver na seguinte imaxe de satélite desta mesma tarde.

Pois ben, a situación vai continuar nas mesmas. As altas presións seguirán favorecendo a estabilidade atmosférica sobre a península Ibérica facendo que o sol luza durante toda a semana. Unicamente polo norte e leste peninsulares podería presentarse algo de nebulosidade e mesmo que estas nubes deixen caer algunhas gotas. En imaxes podes ver todo isto nas seguintes imaxes do modelo GFS previstas para o vindeiro mércores ao mediodía para os campos de isóbaras e nebulosidade (esquerda) e o campo de precipitación (dereita).

E si, seguiremos con esta calor de outubro con temperaturas por riba dos 30º en moitos puntos da península, sobre todo polo centro e sur.

O vento estará presente polo noroeste e sur deixándose notar máis do que gustaría.

Si, seguirá este tempo tan apacible en Galicia nos vindeiros días con moito sol, algunhas nubes polo norte, e temperaturas máis que agradables, rozando e mesmo superando puntualmente os 30º no interior do país. Ademáis ata finais de semana non se notará o vento.

Como les, temos por diante unha semana moi agradable por diante que calquera diría que estamos a comezos de outubro.

Comentarios (0) Out 02 2017

Sol e calor na fin de semana?

Posted: under O tempo.

Estamos a piques de rematar este mes de setembro e comezar o de outubro todo nunha fin de semana e, con que tempo? Pois co que che vou contar agora mesmo.

Como ves na imaxe de satélite desta mesma tarde, o sol é o que predomina sobre a península Ibérica, agás polo extremo oeste onde hay algunhas nubes que non deixaron pasar ese sol.

Pois ben, seguiremos sen moitos cambios nos vindeiros días porque as altas presións van continuar afectando á península. Unicamente a partir de mañá venres unha fronte moi feble afectará ao norte peninsular deixando máis nubes e mesmo algo de chuvia co avance das horas de oeste a leste por esa zona, mentres o resto do territorio queda con máis sol, algunha nube si, pero sol en liñas xerais. Podes ver o resumo disto coas seguintes saídas do modelo GFS previstas para o sábado ao mediodía para os campos de isóbaras e nebulosidade (esquerda) e o campo de precipitación (dereita).

Esta fin de semana non haberá moitos cambios nas temperaturas porque se manterán nos mesmos valores destes días, tanto polo norte, coma polo centro, coma polo sur e tanto máximas como mínimas.

Do mesmo xeito que coas temperaturas, o vento non experimentará variacións dado que apenas se notará, agás polo sur o vento de levante que si se notará un pouco máis.

Si, tampouco variará o tempo en Galicia. Seguiremos con este contraste entre o noroeste e o resto porque no primeiro haberá máis nubes e mesmo poderían caer algunhas gotas mañá venres e o sábado por culpa desa fronte, mentres o resto do país queda sen chuvia e con bastante sol, especialmente o domingo. As temperaturas baixarán mañá e o sábado, pero xa o domingo se recuperarán a valores como os de onte e hoxe deixando un día moi agradable. O vento? Pois practicamente ausente.

Como les, temos unha fin de semana moi xeitosa por diante para este cambio de mes, así que a gozar dela e vémonos o luns.

Comentarios (0) Set 28 2017

Tranquilidade no tempo?

Posted: under O tempo.

Comezamos esta primeira semana do outono despois dun tempo relativamente tranquilo na fin de semana, pero, continuará así ao longo desta semana? Imos ver.

De momento vemos que as nubes están restrinxidas ao norte peninsular principalmente, tal e como nos mostra a imaxe de satélite desta mesma tarde.

Pois ben, a situación non che vai cambiar moito nos vindeiros días. As altas presións seguirán a mandar sobre a península Ibérica, aínda que deixarán pasar algunha fronte polo norte. Polo tanto, o que se espera para esta semana é que haxa bastante sol, aínda que non completo porque as nubes estarán presentes. Mediada a semana será cando cheguen máis nubes e mesmo algunhas gotas ao norte peninsular co paso dunha fronte, xunto coa posibilidade de treboadas polo leste. Podes ver isto nas seguintes imaxes do modelo GFS previstas para a tarde do mércores para os campos de isóbaras e nebulosidade (esquerda) e campo de precipitación (dereita).

De temperatura seguiremos sen cambios importantes. Quizais será no norte onde se note máis o lixeiro ascenso de temperaturas que vai a haber.

O vento nada, só polo noroeste e na zona do estreito o levante se notarán algo máis no final da semana.

Si, en Galicia teremos unha semana relativamente tranquila e agradable no tempo. Aínda que non estará totalmente despexado, será o sol o que mande, agás polo noroeste na tarde do mércores e noite de mércores a xoves onde podería chover algo. As temperaturas estarán sen cambios durante toda a semana e o vento ata finais non se notará nese noroeste coa entrada da fronte.

Como les, seguimos cun tempo bastante xeitoso, que diría a maioría da xente dado que a falta de auga é importante e faría falta que chovese.

Comentarios (0) Set 25 2017

Volto co tempo!!!

Posted: under O tempo.

Xa estou aquí de volta!!!

Non sei se me botarías moito de menos, pero un tamén ten que descansar, así que despois desta paréntese dunhas semaniñas sen actualizar este blogue, xa volto a contarvos como se presenta o tempo nos vindeiros días.

Antes de falar do que ven, compre ver como temos a situación neste momento a través da imaxe de satélite desta mesma tarde. Nela podes ver como as nubes cubren o oeste da península Ibérica e mesmo deixaron algo de chuvia, mentres que no resto quedan máis libres delas.

Pois ben, a situación vaise ir compondo en liñas xerais co avance das horas. As altas presións irán entrando polo oeste aportando certa estabilidade a gran parte da península porque polo nordeste non será tanto porque as treboadas estarán presentes, especialmente na xornada de mañá venres e o sábado en certa medida. Só aí aparecerán as nubes de evolución e os chuvascos treboentos porque no resto da península o sol será máis protagonista que as nubes ata o domingo cando polo noroeste comezará a entrar unha fronte, tal e como podes ver nas seguintes imaxes do modelo GFS previstas para os vindeiros días pola tarde: venres na parte superior, sábado no centro e domingo na parte inferior, todas elas cos campos de isóbaras e nebulosidade (esquerda) e o campo de precipitación (dereita).

A medida que se consolida o anticiclón afectanto á península teremos un lixeiro ascenso das temperaturas co avance dos días, notándose principalmente nas mínimas e polo norte peninsular.

Co vento non haberá problemas porque estará relativamente tranquilo, agás pola zona do estreito de Xibraltar onde se notará un pouco máis.

E si, despois desta poquiña chuvia de hoxe en Galicia tocarán un par de días tranquilos sen ela. Malia que haberá nubes, non moitas, pero algunha si, o sol mandará nos vindeiros días ata o domingo que será cando volten as nubes máis estruturadas e mesmo traian algo de chuvia polo oeste galego nas últimas horas do día. De temperatura non imos notar moitos cambios porque, en liñas xerais, estarán sen moitos cambios importantes. O vento apenas se notará, a menos que estés polo litoral coruñés onde si se notará con certa intensidade.

Como les, toca fin de semana tranquilo nisto do tempo, agás mañá polo nordeste onde non o será tanto, pero xa logo se irá tranquilizando.

Comentarios (0) Set 21 2017

Ala, que me vou de vacacións!!!

Posted: under Calquer cousa.

Despois doutro verán a pé de modelos meteorolóxicos para a súa interpretación e contarche, tanto neste blogue coma no meu twitter persoal (@omtesouro) e, sobre todo, como un dos portavoces de MeteoGalicia, chega a hora de desconectar e relaxarme unhas semaniñas que boa falta me fan despois dunha tempada de moito stress, tanto no profesional coma no persoal.

Polo tanto, ata pasada a metade do mes de setembro deixarei as isóbaras, os modelo meteorolóxicos e todo o relacionado con este mundo da meteoroloxía tranquilos e tentarei gozar dun bo descanso que creo que teño ben merecido.

Vémonos en nadiña!!!!

Comentarios (0) Ago 25 2017

Fin de semana treboento?

Posted: under O tempo.

Ben, estamos ás portas da fin de semana e despois de tanta calor xa estás que ferves para que chegue algo de auga para refrescar, non si? Pois imos ver se será nesta fin de semana ou non.

De momento de chuvia nada, como podes ver na seguinte imaxe de satélite onde, salvo polo norte, no resto da península o sol foi o que mandou e quentando ben outro día máis.

Pois ben, parece que a situación vai a cambiar nos vindeiros días, mais concretamente na fin de semana porque mañá venres aínda haberá estabilidade con bastante sol. Aínda non está moi clara a situación concreta, pero a xeral si e non é outra que o descolgue dunha DANA (Depresión Aislada en Niveles Altos) que vai a afectar á península Ibérica. Digo que a situación concreta aínda non está clara porque segundo se coloque a DANA vai provocar máis ou menos chuvascos treboentos con maior ou menor intensidade. En xeral, a probabilidade é alta en toda a península, pero, como digo, segundo a posición exacta da DANA as consecuencias serán maiores ou menores. Para ilustrar isto póñoche as dúas seguintes imaxes do modelo probabilístico de ensembles  con 21 membros do WRF que usamos en MeteoGalicia:

1.- Aquí podes ver o campo de isóbaras en superficie e en capas medias previsto para a madrugada do sábado ao domingo onde unha baixa se vai a situar ao oeste da península Ibérica en liñas xerais, pero maís ou menos preto desprazándose a DANA con ela sobre a mesma.

2.- Aquí podes ver a precipitación acumulada para o domingo pola tarde onde, como podes ver, cada membro do ensemble coloca os núcleos importantes de precipitación segundo a posición da DANA.

Resumindo, mañá venres aínda día de bastante sol e calor, o sábado xa poderían aparecer as primeiras treboadas e o domingo sería o día da festa completa podendo caer a treboada en calquer punto da península Ibérica e cunha intensidade forte nalgún sitio con saraiba e aparato eléctrico importante.

Seguiremos coa calor en liñas xerais; cunha lixeira relaxación polo norte. Aínda asi a sensación de bochorno estará presente toda da fin de semana.

Como co problema da chuvia vai ser suficiente, desta vez o vento non dará problemas e estará tranquilo.

Si, a predición en Galicia tampouco é moi sinxela tendo dous escenarios posibles a conta da baixa esa que se instalará ao oeste da península Ibérica. A primeira opción e a máis probable é que teñamos unha fin de semana de bastante sol coa aparición de treboadas tanto na tarde do sábado coma do domingo, sendo importantes nalgúns puntos. A outra opción, menos probable, pero para ter en conta, é que a borrasca se achegue máis á Galicia e nos deixe moitas máis nubes e chuvia máis a feito debido a que a súa fronte asociada nos afecte, manténdose a alta probabilidade de treboadas pola entrada de aire frío en capas medias e altas da atmosfera. O que si, voltaremos a ter algo de calor, o normal para esta época do ano e pouco vento. Todo isto despois dun venres moi semellante ao que foi este xoves.

Como les, toca unha fin de semana bastante movido no meteorolóxico, pero aínda coa incertidume de saber onde caerá o gordo das treboadas. Aínda así, estaría ben estar preparados para tomar as medidas adecuadas porque en calquer punto as chuvascos poden ser moi importante e máis despois de tanto sen chover e coa terra tan seca.

Comentarios (0) Ago 24 2017