Volto co tempo!!!

Posted: under O tempo.

Xa estou aquí de volta!!!

Non sei se me botarías moito de menos, pero un tamén ten que descansar, así que despois desta paréntese dunhas semaniñas sen actualizar este blogue, xa volto a contarvos como se presenta o tempo nos vindeiros días.

Antes de falar do que ven, compre ver como temos a situación neste momento a través da imaxe de satélite desta mesma tarde. Nela podes ver como as nubes cubren o oeste da península Ibérica e mesmo deixaron algo de chuvia, mentres que no resto quedan máis libres delas.

Pois ben, a situación vaise ir compondo en liñas xerais co avance das horas. As altas presións irán entrando polo oeste aportando certa estabilidade a gran parte da península porque polo nordeste non será tanto porque as treboadas estarán presentes, especialmente na xornada de mañá venres e o sábado en certa medida. Só aí aparecerán as nubes de evolución e os chuvascos treboentos porque no resto da península o sol será máis protagonista que as nubes ata o domingo cando polo noroeste comezará a entrar unha fronte, tal e como podes ver nas seguintes imaxes do modelo GFS previstas para os vindeiros días pola tarde: venres na parte superior, sábado no centro e domingo na parte inferior, todas elas cos campos de isóbaras e nebulosidade (esquerda) e o campo de precipitación (dereita).

A medida que se consolida o anticiclón afectanto á península teremos un lixeiro ascenso das temperaturas co avance dos días, notándose principalmente nas mínimas e polo norte peninsular.

Co vento non haberá problemas porque estará relativamente tranquilo, agás pola zona do estreito de Xibraltar onde se notará un pouco máis.

E si, despois desta poquiña chuvia de hoxe en Galicia tocarán un par de días tranquilos sen ela. Malia que haberá nubes, non moitas, pero algunha si, o sol mandará nos vindeiros días ata o domingo que será cando volten as nubes máis estruturadas e mesmo traian algo de chuvia polo oeste galego nas últimas horas do día. De temperatura non imos notar moitos cambios porque, en liñas xerais, estarán sen moitos cambios importantes. O vento apenas se notará, a menos que estés polo litoral coruñés onde si se notará con certa intensidade.

Como les, toca fin de semana tranquilo nisto do tempo, agás mañá polo nordeste onde non o será tanto, pero xa logo se irá tranquilizando.

Comentarios (0) Set 21 2017

Ala, que me vou de vacacións!!!

Posted: under Calquer cousa.

Despois doutro verán a pé de modelos meteorolóxicos para a súa interpretación e contarche, tanto neste blogue coma no meu twitter persoal (@omtesouro) e, sobre todo, como un dos portavoces de MeteoGalicia, chega a hora de desconectar e relaxarme unhas semaniñas que boa falta me fan despois dunha tempada de moito stress, tanto no profesional coma no persoal.

Polo tanto, ata pasada a metade do mes de setembro deixarei as isóbaras, os modelo meteorolóxicos e todo o relacionado con este mundo da meteoroloxía tranquilos e tentarei gozar dun bo descanso que creo que teño ben merecido.

Vémonos en nadiña!!!!

Comentarios (0) Ago 25 2017

Fin de semana treboento?

Posted: under O tempo.

Ben, estamos ás portas da fin de semana e despois de tanta calor xa estás que ferves para que chegue algo de auga para refrescar, non si? Pois imos ver se será nesta fin de semana ou non.

De momento de chuvia nada, como podes ver na seguinte imaxe de satélite onde, salvo polo norte, no resto da península o sol foi o que mandou e quentando ben outro día máis.

Pois ben, parece que a situación vai a cambiar nos vindeiros días, mais concretamente na fin de semana porque mañá venres aínda haberá estabilidade con bastante sol. Aínda non está moi clara a situación concreta, pero a xeral si e non é outra que o descolgue dunha DANA (Depresión Aislada en Niveles Altos) que vai a afectar á península Ibérica. Digo que a situación concreta aínda non está clara porque segundo se coloque a DANA vai provocar máis ou menos chuvascos treboentos con maior ou menor intensidade. En xeral, a probabilidade é alta en toda a península, pero, como digo, segundo a posición exacta da DANA as consecuencias serán maiores ou menores. Para ilustrar isto póñoche as dúas seguintes imaxes do modelo probabilístico de ensembles  con 21 membros do WRF que usamos en MeteoGalicia:

1.- Aquí podes ver o campo de isóbaras en superficie e en capas medias previsto para a madrugada do sábado ao domingo onde unha baixa se vai a situar ao oeste da península Ibérica en liñas xerais, pero maís ou menos preto desprazándose a DANA con ela sobre a mesma.

2.- Aquí podes ver a precipitación acumulada para o domingo pola tarde onde, como podes ver, cada membro do ensemble coloca os núcleos importantes de precipitación segundo a posición da DANA.

Resumindo, mañá venres aínda día de bastante sol e calor, o sábado xa poderían aparecer as primeiras treboadas e o domingo sería o día da festa completa podendo caer a treboada en calquer punto da península Ibérica e cunha intensidade forte nalgún sitio con saraiba e aparato eléctrico importante.

Seguiremos coa calor en liñas xerais; cunha lixeira relaxación polo norte. Aínda asi a sensación de bochorno estará presente toda da fin de semana.

Como co problema da chuvia vai ser suficiente, desta vez o vento non dará problemas e estará tranquilo.

Si, a predición en Galicia tampouco é moi sinxela tendo dous escenarios posibles a conta da baixa esa que se instalará ao oeste da península Ibérica. A primeira opción e a máis probable é que teñamos unha fin de semana de bastante sol coa aparición de treboadas tanto na tarde do sábado coma do domingo, sendo importantes nalgúns puntos. A outra opción, menos probable, pero para ter en conta, é que a borrasca se achegue máis á Galicia e nos deixe moitas máis nubes e chuvia máis a feito debido a que a súa fronte asociada nos afecte, manténdose a alta probabilidade de treboadas pola entrada de aire frío en capas medias e altas da atmosfera. O que si, voltaremos a ter algo de calor, o normal para esta época do ano e pouco vento. Todo isto despois dun venres moi semellante ao que foi este xoves.

Como les, toca unha fin de semana bastante movido no meteorolóxico, pero aínda coa incertidume de saber onde caerá o gordo das treboadas. Aínda así, estaría ben estar preparados para tomar as medidas adecuadas porque en calquer punto as chuvascos poden ser moi importante e máis despois de tanto sen chover e coa terra tan seca.

Comentarios (0) Ago 24 2017

Buff, que calor!!!

Posted: under O tempo.

Buff, que calor, non si? E si, ademais en toda a península Ibérica, incluido este recuncho do noroeste onde “sempre” chove chamado Galicia. Agora só queda saber cando marcha a calor e se voltaremos á normalidade con temperaturas máis agradables, así que a iso vou agora, a contarche se será así ou non.

E si, xunto con esta calor o que cabe esperar é un ceo con moito sol e moi pouca nube e así foi hoxe, tal e como podes comprobar na seguinte imaxe de satélite desta mesma tarde.

Pois ben, a situación non vai cambiar en demasía nos vindeiros días en canto ao estado do ceo porque en canto en canto temperaturas algo vai relaxar polo norte. Polo tanto, as altas presións seguirán afectando á península Ibérica nos vindeiros días, pero algo máis débiles que xunto con vento do norte deixarán un norte con máis nubes e mesmo algo de chuvia e ceo bastante despexado canto máis ao sur. Agora ben, polo nordeste e leste peninsulares cara finais de semana podería algún que outro chuvasco treboento que refresque a tarde-noite. Podes ver isto nas seguintes imaxes do modelo previstas para a medianoite do mércores ao xoves para os campos de isóbaras e nebulosidade (esquerda) e o campo de precipitación (dereita).

Si, baixará a calor. Polo centro e norte peninsulares non se notará tanto, pero si polo norte onde o día de hoxe foi de carallo coa calor, valores poucas veces acadados.

E para completar isto apenas haberá vento, así que en moitos sitios quizais a sensación de calor sexa maior.

Ben, esta Galicia abafante de calor de hoxe irá a menos. Mañá xa polo litoral as temperaturas vanse suavizar bastante, mentres que no interior non tanto, pero con calor máis soportable. Iso si, todo con bastante sol en liñas xerais, con algunhas nubes máis polo norte e no litoral atlántico nas primeiras e derradeiras horas do día e todo con moi pouco vento, agás cara finais de semana no litoral onde se notará bastante máis.

Como les, seguimos cun agosto moi caloroso sobre a península Ibérica, en toda, porque ata Galicia chegou esa masa de aire cálido que nos está facendo quecer.

 

Comentarios (0) Ago 21 2017

Sol e calor?

Posted: under O tempo.

Ben, xa estou aquí de volta despois do descanso deste luns para contarche que nos deparará a fin de semena nisto do tempo, así que non me enredo máis e paso a escribircho.

Como ves na seguinte imaxe de satélite desta tarde, salvo algunhas nubes polo norte, o ceo estivo e está bastante despexado.

Pois ben, o conto non che vai cambiar moito porque o anticiclón seguirá a ser o protagonista deste tempo na fin de semana, así que moi poucas nubes en toda a península, agás polo norte onde o vento de compoñente norte provocará que aumente a nebulosidade e mesmo deixe algo de chuvia. O resumo visual telo nas seguintes imaxes do modelo GFS previstas para o sábado ao mediodía para os campos de isóbaras e nebulosidade (esquerda) e o campo de precipitación (dereita).

Si, irá calor. Aínda máis porque as temperaturas ascenderán e polo centro e sur peninsulares fará moita calor.

O vento de levante fará das súas na zona do estreito de Xibraltar na fin de semana porque promete soprar con certa intensidade. Xa no resto da península estará tranquilo, agás polo oeste onde se notará un pouco máis.

E si, sol e calor en Galicia para esta fin de semana. Esta noite máis nubes con algo de chuvia polo norte, pero xa logo virá o sol e ven para quedarse toda a fin de semana e quentando cada día máis deixando unha fin de semana de sol e calor, sobre todo o domingo e ademais con pouco vento, agás no litoral onde soprará cunha intensidade maior.

Como les, toca fin de semana típica de agosto con moito e sol e calor en toda a península, case sen excepcións.

Comentarios (0) Ago 17 2017

Verán con xeito?

Posted: under O tempo.

Xa case estamos na metade do mes e cunha ponte á vista no comezo da vindeira semana, así que hoxe toca estender un pouco máis a predición porque de seguro que estás a facer plans, non si? Pois alá vou.

O que temos enriba nosa aínda son nubes se te atopas polo norte peninsular, mentres que a medida que estés máis preto do sur o que terás é o sol, pero non quentando tanto debido á entrada de aire frío do día de onte e que fixo que algo refrescase. Para ver o estado do ceo só tes que centrarte na seguinte imaxe de satélite desta tarde e comprobar o que che acabo de dicir.

Pois ben, a situación non che vai cambiar moito no sentido do estado do ceo porque no da temperatura si. Este aire frío que fixo baixar as temperaturas con valores moi por baixo dos habituais en agosto polo norte vaise a retirar e pouco a pouco irán subindo os valores nos termómetros. Seguiremos con moito sol, algunhas nubes polo litoral cantábrico, durante os vindeiros días con tendencia, xa entrada a semana, a perderse algo de influencia anticiclónica polo norte e que poda chegar algunha fronte que anubre máis o ceo e deixe algo de precipitacións. Iso si, aínda quedará a posibilidade dalgún chuvasco treboento no día de mañá e menos na fin de semana. Resumindo, ata o domingo e case o luns moito sol con temperaturas en ascenso, calorosas polo centro e sur e xa a partir do martes máis nubes polo norte e mesmo algo de chuvia, sen descartar treboadas e con temperaturas en descenso nesas zonas. E agora en imaxes coas saídas do modelo GFS previstas para este sábado ao mediodía (imaxes superiores) e as previstas para a medianoite do luns ao martes (imaxes inferiores) para os campos de isóbaras e nebulosidade (esquerda) e precipitación (dereita).

Como dicía, as temperaturas irán subindo pouco a pouco, notándose sobre todo polo norte (como non co “frío” que fixo estes días) e volvendo a valores calorosos non centro e sur peninsulares. Co comezo da semana volta o descenso ao norte e non tanto no resto.

O vento de levante con intensidade importante acompañará polo sur e sueste peninsulares durante os vindeiros días, xunto co vento do norte polo litoral atlántico. No resto todo máis tranquilo, moi pouco vento en xeral.

E si, imos encadenar varios días de sol seguidos en Galicia. Polo menos ata o luns respetaría este sol que comezou hoxe a quentar de novo, así que toca ter o “kit de praia” listo porque poderemos gozar del como mínimo ata o luns. Xa logo parece que as condicións cambian e o anticiclón retírase un pouco e chegarían algunhas nubes. Iso si, todo isto hai que collelo con pinzas e tomalo como unha tendencia e, en termos deportivos, hai que ir indo “partido a partido” como está sendo este verán en Galicia. Como dicía, as temperaturas voltarán a valores máis típicos de agosto con máis calor polo interior e Rías Baixas xunto cunha diminución da intensidade do vento que seguirá a ser do nordés.

Como les, non pinta mal nin a fin de semana nin a ponte, salvo se te atopas polo norte porque por aí si se esperan algo de cambios no comezo da vindeira semana.

Comentarios (0) Ago 10 2017

Frío en agosto?

Posted: under O tempo.

Ben, comezamos unha nova semana xa dentro do mes por excelencia das vacacións que é agosto e ti, se estas nelas, aínda máis pendente do tempo, non si? Pois vou agora a contarche o que nos ven  para esta semana.

O que temos agora mesmo non é outra cousa que o paso dun sistema frontal moi feble, destes de verán que traen bastante nube, pero moi pouca auga, e algunha nube de evolución polo leste, tal e como podes ver na seguinte imaxe de satélite desta mesma tarde.

Pois ben, o conto é que tras o paso desta fronte as altas presións irán entrando polo oeste peninsular e provocando a estabilización da atmosfera, pero tamén a entrada de aire frío procedente de latitudes máis altas. Polo tanto, o ceo pouco anubrado o despexado será o que mande sobre a península, pero con máis nebulosidade polo norte e mesmo con algunha chuvia. Tamén polo leste haberá chuvia, pero neste caso doutro tipo xa que esta terá carácter treboento, así que máis xunta en pouco tempo. O resto da península, con bastante sol. Podes ver isto nas seguintes imaxes do modelo GFS previstas para o vindeiro mércores pola tarde para os campos de isóbaras e nebulosidade (esquerda) e o campo de precipitación (dereita).

Si, marchará a calor. Esta entrada de aire frío fará que baixen moito as temperaturas, especialmente polo norte onde mesmo fará frío. Si, frío no mes de agosto porque a baixa será importante, tal e como podes comprobar se comparas as dúas seguintes imaxes da temperatura en superficie deste mesmo luns (esquerda) e a prevista para o mércores (dereita).

O vento do norte notarase no litoral cantábrico, pero sobre todo polo oeste con intervalos ata fortes na metade da semana. A zona do estreito tampouco se libra, pero desta vez con menos intensidade que polo oeste. Onde apenas se notará será no resto do territorio peninsular.

Si, ven o sol a Galicia. Despois de varios días con máis nubes que sol, éste chegará e ben, pero non quentará ata finais de semana porque con esta entrada de aire frío os termómetros non dirán que estemos en agosto, máis ben en outono polo fresco que irá e que se acrecentará na sensación térmica debido a que este vento do norte, por momentos, se notará e ben.

Como les, toca andar algo abrigado para estarmos en agosto se andas polo norte e agradecerás este fresco se andas polo centro e sur peninsulares porque por aí non hai que pare coa calor.

Comentarios (0) Ago 07 2017

Veraneando en serio?

Posted: under O tempo.

Rematamos mes e xa temos o mes de agosto enriba, típico mes de vacacións por excelencia, e ti pensando no tempo e en se podes ir a praia ou non, verdade? Pois para todo o mes non, pero para esta semana algo che vou dicir agora deste tempo.

O que temos neste momentos e que podes ver na seguinte imaxe de satélite desta tarde non é outra cousa que unha fronte afectando ao oeste peninsular, mentres que o resto do territorio luce o sol.

Pois ben, a situación non vai a cambiar moito nos vindeiros días. As altas presións van a seguir mandando en liñas xerais, cun lixeiro debilitamento das mesmas polo norte no remate da semana. Isto significa que o sol será o protagonista principal sobre a península con algunhas nubes por aí desperdigadas, con aumento das mesmas xa rematando a semana debido ao achegamento dun sistema frontal feble que anubrará o norte mesmo podería deixar algunha chuvia feble. Pero ollo, que non todo vai ser tranquilidade porque polo leste peninsular existe a posibilidade de que algún chuvasco treboento poda aparecer e deixe algo de chuvia, mesmo forte. Podes ver todo isto na seguintes imaxes do modelo GFS previstas para o vindeiro mércores pola tarde para os campos de isóbaras e nebulosidade (esquerda) e o campo de precipitación (dereita).

Se xa está a facer calor, aínda irá máis porque as temperaturas estarán en ascenso xeneralizado en toda a península, chegando a valores bastante calorosos polo centro e sur cara a finais da semana.

O vento estará tranquilo, agás polo sur onde se notará máis e polo noroeste a partir da tarde do mércores avisando da entrada da fronte.

Si, aínda que non estará un tempo de praia, a chuvia vai respetar a Galicia. Non de todo, pero en gran medida si. O litoral das provincias da Coruña e Pontevedra presentará máis nubes que irán a menos segundo nos movamos cara o leste. En dentro desas nubes non se descarta algún orballo alá pola Costa da Morte. De vento sen noticias ata o mércores pola noite e xoves como avanzadilla da entrada dunha fronte feble. Iso si, cada día un chisco máis de calor, pero sen chegar a valores abafantes.

Como les, toca semana de verán case típica co refresco treboento polo leste, así que coidado non te pille unha boa molladura.

Comentarios (0) Xul 31 2017

Tranquilidade meteorolóxica?

Posted: under O tempo.

Ben, despois da pequena ponte que me fixen o luns con isto do Día da Patria Galega o martes, xa retomo a miña actividade neste blogue e che traio a predición para esta fin de semana. E como virá? Seguro que é o que te estás a preguntar, verdade? Pois agora che saco de dúbidas.

De momento o que manda é o sol, agás se estás polo norte e noroeste onde unha fronte está a deixar o ceo con algunha nube e mesmo algún que outro orballo, tal e como podes ver na seguinte imaxe de satélite de primeira hora desta tarde.

Pois ben, a situación non che vai a cambiar moito. Maioritariamente as altas presións ao oeste da península Ibérica serán as que condicionen o tempo, así que o sol con algunha nube de decoración está garantizado para os vindeiros días. Agora ben, polo noroeste podería rozar algunha fronte feble e deixar algo de chuvia, así como aparecer algún que outro chuvasco treboento polo leste peninsular. Podes ver isto nas seguintes imaxes do modelo GFS previstas para a tarde do sábado: á esquerda o campo de isóbaras e nebulosidade e á dereita o campo de precipitación.

Iso si, seguirá a calor en gran parte da península, agás polo norte onde relaxará co avance dos días.

O vento estará tranquilo e salvo o noroeste, apenas se notará.

Si, Galicia, ese noroeste do que estou a falar nos parágrafos anteriores será o recuncho onde non haberá tanto sol. A fin de semana non pinta moito de praia porque polo litoral é por onde máis nubes haberá e quedando o leste máis libre delas e mesmo con bastante sol por momentos. Teremos descenso de temperaturas paseniño día a día e paralelamente un aumento da intensidade do vento.

Como les, menos se andas polo noroeste, no resto da península non pinta nada mal esta derradeira fin de semana de xullo e se andas polo noroeste, pois eche o que ten o verán por aquí.

Comentarios (0) Xul 27 2017

Tempo de relax?

Posted: under O tempo.

Aínda estamos recuperándonos da calor destes días, pero ao mesmo tempo mirando cara a fin de semana para ver o que a atmosfera nos ten preparada, non si? Pois xa me poño a analizar mapas e paso a contarcho.

O que ves na seguinte imaxe de satélite desta mesma tarde é que as nubes mandaron sobre o norte e, en menor medida, polo leste penisnular e mesmo polo Cantábrico deixaron algunha que outra chuvia.

Pois ben, parece que a situación vaise manter nos vindeiros días. As altas presións influenciarán á península Ibérica, pero non de xeito completo. Así, polo norte aínda se esperan algunhas nubes e mesmo con algo de chuvia, mentres no resto do territorio peninsular o sol será o protagonista, pero ollo, que polo leste poderán aparecer algún chuvasco treboento. Podes ver isto nas saídas do modelo GFS previstas para o sábado ao mediodía: á esquerda os campos de isóbaras e nebulosidade e á dereita o de precipitación.

De temperatura imos andar ben. As altísimas temperaturas xa case son historia e estaremos en valores máis normais para esta época do ano polo centro e sur, mentres que polo norte chegarán a eles co previsto ascenso progresivo das temperaturas segundo avancen os días.

Co vento só polo oeste haberá problemas porque soprará con certa intensidade porque no resto da península apenas se notará.

O tempo para Galicia non pinta mal. Irase compondo e o sol irá collendo sitio no ceo do país, agás polo noroeste onde haberá máis nubes e mesmo algunha gota se podería escapar na mañá do sábado, pero en xeral, tempo bastante agradable porque de temperatura imos estar ben, sen calor de máis; con valores normais para esta época do ano. O vent estará tranquilo en liñas xerais, agás na fin de semana pola zona da Rías Baixas soprará con certa intensidade.

Como les, non pinta mal a fin de semana. A calor gorda marchou, ven calor normal e con bastante sol e quizais algunha que outra treboada polo leste peninsular.

Comentarios (0) Xul 20 2017